Mizoram Journalist Association, Kolasib District chuan Vairengte leh Aizawl inkar kawngpui laih zauh tura zangnadawmna sem tawh chungchang an chhui chiannaah thil felhlel a awm ngeia a lan thu an sawi.
Kolasib MJA hian National Highway 306(A) Vairengte leh Aizawl inkar kawngpui, NHIDCL-in a laih zauh tura zangnadawmna sem tawh RTI hmanga an zawhna chhanna an dawn bawhzuiin Inrinni khan Bilkhawthlir tlawhin village council leh YMA hruaitute an kawm.
VCP pakhat chuan a thianpa a nih angin Kolasib-a journalist pakhat chu VC pass lehkha dah khah loh chu a hming ziak ngeiin a pek thu a lo hrilh tih an sawi a. ‘Ram lak chungchanga thuneitu, CALA-in a siamsak ve dawn’ tia a dil avanga VC pass hi dah khah lohin, a hming ziak hnanin a pek ngei thu a sawi tih MJA-ten an sawi.
Kolasib MJA sawi danin, VC Secretary pakhat chuan Kualmawi YMA Branch-in an enkawl, social forestry ram bula kawngpui hlui kalna chu a tirah surveyor-ten zangnadawmna pek tawhna a nih avangin ‘mark’ theih a ni lo tih an sawi a. Mahse, a hnuah helaiah hian VC Pass a lo awm leh ta nia sawi a ni a. RTI chhanna atanga a lan danin helaiah hian mi pakhat hnenah zangnadawmna pek a ni a, kuhva kung puitling eng emaw zat a awm tih tar lan a ni.
Rs nuai 200 chuang zangnadawmna pek chhuahna ram pakhat chu an zir chiannaah zangnadawmna latu hian a lakna ram hi Rs. nuai 60-in a lei a. A ram leina pa chu kawmin ram neitu chuan kawngpui kalna tur chin, meter 300 vela sei chu Rs. nuai 60-a a hralh thu leh a leitu hian pawisa a pek tlak nghal vek thu leh Rs. nuai 200 chuang zangnadawmna lakna tur khawp thlai a awm em tih zawhna chu an hriatthiam loh thuin an lo chhang a. RTI chhanna atanga a lan danin helai ramah hian kuhva leh thlai chi hrang hrang a awm a ni.
YMA hruaitu pakhat an kawmnaah social forestry huam chhungah YMA hminga an zangnadawmna lak tur angte an lak thu leh lak loh hlawm khat an la neih thu hriat a ni a. Hetih lai hian helai hmuna mi pakhat hminga pass lo awm chu an hriatthiam loh thu a sawi a. CALA hnenah pawh VCP hova kala thil an zawh fiah thu sawiin, CALA hian surveyor-ten an han teh a, ram awl lo awm ta chu mi pakhat tan pass siamsak a nih thu a hrilh ni-a sawiin, ‘Social forestry atana hian tun hmain khawtlang hmangaihtu mi eng emaw zatin an pass an lo surrender tawh a. Chutiang a nih laia mi tu emaw hnena zangnadawmna pek a ni ve ringawt hi an ngaihdan a nih hlawm loh thu’ an sawi.
Kolasib MJA President Andrew Vanlalauva chuan Kolasib hi ram hmasawnna hna thawh a nih dawn apianga zangnadawmna chungchanga sawi an kai fo va. Nakin zelah pawh zangnadawmna hi a la awm zel thei a, chutiang hunah pawh mi dik lote an fimkhura khaw êng pawh zah lova thiltih a bo theih nana hma la an nih thu a sawi.
Andrew Vanlalauva chuan an hmalakna chungchangah mi mal tumah an bei lo a, beih tur an awm pawh a hriat loh thu sawiin, “Kan hmalaknaah mi mal hming a lo lang a nih pawhin anmahni kan huat huat vang a ni lo. Hma kan la tan chauh a, kan kal zel dawn a; kan thil hmuh leh hriatte hi puan zar zel a ni ang a; a tul chuan thuneitute hnenah pawh kan thlen ang,” a ti.