Aizawl : Nimin khan Zialung Community Hall, Biate-ah Zirlai titha chawimawina hun an buatsaih a, Khawzawl BDO Pu Lalthakima Chhangte chu khuallian niin, MZP General Headquarters, Aizawl Assistant General Secretary Pu Chinkhanmanga Thomte chu khualzahawm a ni bawk.
Khuallian Pu Lalthakima Chhangte chuan thu sawiin, “Mahni tumah chiana lehkha zir tur a ni. Tum mumal tak neiin, chumi tum chu tihlawhtling turin theihtawp chhuahin in zir tur a ni,” a ti a. “Sawrkar hna thawk kan ngaisang lutuk hi Mizo society kan kalsualna a ni.” tiin, “Sawrkar hna thawh kher hi tum loh tur, eng tikah mah min daih dawn lo,” a ti.
Khuallian chuan, Zirlai kalkhawmte chu, mahni tuma chianga chumi hlen tura theihtawp chhuah turin a chah a, nun tichhe thei ruihtheithil leh nulat tlangvalna lakah inthiarfihlim a, kohhran bel a, khawtlang tana mi lak tlak ni turin a chah.
MZP General Headquarters, Assistant Secretary Pu Chinkhanmanga Thomte chuan, “MZP-in zirlai titha chawimawi kan buatsaih thin hian chhan a nei – in hlawhtlinna kan lawmpui che u rualin, in kova mawhphurhna sang tak a awm a, in lakah beiseina sang tak kan nei a. He chawimawina hi nangmah chotu nise – in thiam leh finna kan ram leh hnam tana hlan let leh ngei ngei turin kan beisei che u a ni,” a ti a.
Pu Chinkhanmanga Thomte chuan, “kan khawhawi kan tihzauh a ngai a, ram leh hnam tana mi tangkai ni turin theihtawp kan chhuah a ngai. Kan ram leh hnam hmasawnna hi thalaite kutah a innghat a. Chumi hlen tur chuan thalaite kan tan sauh sauh a tul.” a ti bawk.