Congress hruaitu, Rahul Gandhi chuan kumin kum tawpa Madhya Pradesh assembly inthlan lo awm turah hnehna an chan ngei tur thu Thawhtanni khan a sawi.
“Rei tak kan sawiho tawh a, kan inchhut dan chuan Karnataka-ah khan bial 136 kan la a, Madhya Pradesh-ah pawh 150 kan la ang,” tiin Gandhi-a hian Delhi-a thuthar lakhawmtute a kawmnaah a sawi.
Thawhtanni khan Madhya Pradesh-a Congress hruaitu lawkte chuan party chief Mallikarjun Kharge leh Gandhi hi an party headquarters-ah an hmaa assembly election inthlan lo awm tur atana inbuatsaihna sawipuiin an kawm.
State unit chief Kamal Nath leh an party Madhya Pradesh in-charge pawh a tel a. Congress hian an party mite tihphura a hniam ber atanga inthlang tura inbuatsaihna kalpui an tum.
“Madhya Pradesh inthlan atan thla li chuang a la awm a. Madhya Pradesh hma lam leh an state-a thil pawimawh hrang hrang sawiho a ni,” tiin Nath chuan an thutkhawm hnuah a sawi.
Party hian BJP rorelna state-ah hian an president hlui, Gandhi-a’n ‘Bharat Jodo Yatra’ a neih laia rorel lai a beihna thilte tho hmangin beihpui an thlak dawn tih an lo sawi tawh.
Party hruaitu, Pawan Khera chuan Kanyakumari atanga Srinagar thlenga Gandhi-a’n kea kawng a zawh lai khan an state chhunga mipui nghawng thil hrang hrang – thil man sang, hna nei lo tam, ei rukna leh hmeichhiate him lohna te sawi lansarh a nih thu a sawi a. Khera hian mipuite pawhin heng thil chin felsak theitu tur political party an beisei niin a sawi bawk.