Aizawl: Union Home Minister Amit Shah hnenah nimin khan Manipur-a tribal pawl hruaitute intelkhawmna, Indigenous Tribal Leaders’ Forum (ITLF) chuan Manipur-ah tribal leh phai mite karah inrelbawlna hran neih bakah Manipur-ah President’s Rule an phut.
Manipur tlawha zin, Shah hian nimin zing khan Manipur khawpui, Imphal-ah Meitei pawl hruaitute a kawm hnuah Churachandpur district tlawhin Tuibong-a 27 Sector Assam Rifles hmunah tribal hnam hruaitu hrang hrangte meeting neihpui lehin heng zingah Kuki MLA-te leh ITLF hruaitute pawh an tel.
ITLF thupuangtu, Ginza Vualzong chuan Shah nena meeting-ah hian thil phut hrang hrang point 11 an theh luh thu a sawi a. Heng zingah hian inrelbawlna hran neih leh Manipur-ah President’s Rule hman nghal a nih phutnate a tel thu a sawi.
Gina Vualzong chuan, “Union Home Minister Shah chuan tun ni 15 lo awm tur chhung muanna awmtir turin min ngen a, hetih chhung hian peace committee dinin kan buaina chin fel a nih theih dan tur ngaihtuah chhuah hman min tiam a ni,” a ti.