Aizawl : Lunglei district Congress committee (LDCC) Vice President R. Lalnunthara’n “Ram sum dinhmun siamṭhat hi kan ram tana hna pawimawh hmasa a nih tlat avangin, Pu Sawta hi kan mamawh a ni” a ti.
LDCC hruaitu ten nimina Leite, Thiltlang, Pangzawl leh Rawpui an party hruaitute an kawmnaah he thu hi a sawi a. “Ram tana rawng kan bawlnaah hian kohhrana rawngbawltu kan nih pawhin, party-a inhmang kan nih pawhin midangte tel ve na tlaka kan thawha, rawng kan bawl a ngai a. Kan awmna hmun ṭheuh hi rawng kan bawlna tur a ni tih hi hre thar leh ila, Party a mawhphurhna leh kohhrana mawhphurhna kan neihte hi midangte tana malsawmna hmunah kan chantir thei a ni” a ti.
Congress party-in unit aṭanga MPCC thlengin mamawh lian tak an nei nia sawiin, LDCC Vice President chuan an mamawh lian tak chu inlungrualna leh thawhhona ṭha a nih thu a sawi a, “chu chu kan thawhlehna tur pawh a ni, a ti bawk.
LDCC Vice President chuan “Mizoram sorkarin leiba a neih dan aṭang pawh hian kum 2023 MLA inthlanah hian Pu Lalsawta kaihhruai a sorkar ngei a ngai takzet tih a chiang hle” a ti a. “Kan ram sum dinhmun siamṭhat hi kan ram tana hna pawimawh hmasa a nih tlat avangin, Pu Sawta hi kan mamawh leh kan ram sum dinhmun siam ṭhat lehna tur a ni” a ti.
“Ram leh hnam tan hian kan hruaitu kal hma- sate khan theihtawp chh- uahin, Mizoram tan ke an lo pen tawh tih hi a takin kan hmu thei” tiin LDCC Vice President chuan “kan hruaitu kal hmasate dahhniamna ni awm taka engmah tih nei lo ang hiala sawina ni awm tak a awm ṭhin hi pawi ka ti a, kan hruaitu hmasate zingah khan Mizoram tana theihtawp takmeuh chhuah a, vawiina Mizoram hmasa- wnna hmelhmangte hi an thawhrah a ni tih te hi kan hriat thar leh a pawimawh em em a ni”, a ti bawk.