Vatican chuan kum 2014 leh 2016 inkara nun (hmeichhe sakhaw rawngbawltu) pawngsualtua puh Indian bishop-in bânna a thehluh chu a pawmsak tih a puang.
Kum 54 mi, Franco Mulakkal-a hi Punjab-a Jalandhar bishop a ni.
Mulakkal-a hian mi pawngsuala puhna hi nasa takin a pha a, nikum khan Kerala-a trial court chuan thiam a chantir nghe nghe.
India-a Vatican palai chuan Kerala High Court-a Mulakkal-a thiam chantir a nihna khin letna chu pawm a nih thu a sawi.
Ningani khan Mulakkal-a hian bânna a thehluh chu pawmsak a nih thu a sawi a, hun harsa a tawh laia amah thlawptu leh a lama tangte hnenah lawm thu a sawi bawk.
Vatican palaiin thuchhuah a siamah chuan Mulakkal-a hi ‘thutlukna siamsak hmabak’ a la nih thu leh bân chu ‘Jalandhar thatna tur’ leh bishop thar ruatna tur kawng a inhawn theih nana tih a nih thu a tar lang niin The Times of India chanchinbu chuan a tar lang.
Mulakkal-a bân hi dan lova khawsak vanga hremna (disciplinary action) a nih loh thu a sawi bawk.
Kristian pawl hrang hrang inzawm khawmna, Joint Christian Council chuan Mulakkal-a bân a ni chu lawmawm an tih thu an sawi.
Mulakkal-a hi an puhna avang hian kum 2018 khan Kerala-ah man a ni a. Vatican pawhin bishop a nihna anga a tih turte chu tirih lo turin a hna atangin an chawlhtir lailawk ve bawk.
Kum 2022-a trial court-in thiam a chantir hnuah khan a pawngsual tuartu nia insawi nun dan hre mite chuan high court-ah an beih leh ngei tur thu an sawi nghal a ni.