Union Home Minister Amit Shah-a’n tlawha muanna a awm theihna tura ruahmanna siamte a puan hnuah Manipur-a district pangaah chuan curfew hlih a ni a, hmun dang thenkhatah pawh hlih then a ni bawk.
Home minister hian warning a pek hnuah Manipur-ah hian ralthuam 140 pek a ni bawk tih state police chuan a puang a. Thla hmasa tir lama chi leh chi inkara buaina a chhuah atang khan police kut atangin ralthuam 2,000 vel ruk nia hriat a ni.
Shah hian ni li chama Manipur a tlawh chhungin pawl leh mi hrang hrang a kawm a. Ningani khan ralthuam ruk kawltute chu pe kir tura vauin an pe kir lo a nih chuan an lakah na taka chet a nih tur thu a sawi a. Tharum thawhna thleng chu chhui a nih tur thu leh muanna a awm leh theih nan peace committee din a nih tur thu a puang bawk.
Darkar 24 liam ta chhungin district hrang hrangah ralthuam 140 pek kir nghal a ni tih police chuan an puang zui a ni.
Ralthuam pek kir zingah hian AK-47, INSAS Rifle, teargas, sten gun, grenade launcher leh pistol chi hrang hrang a tel.
“Heng ralthuamte hi service laite hman tur vek an ni a, khuahkhirh tlat an ni,” tiin police officer-in a sawi.
Home minister hian ralthuam bote chu chhui zui turin venhim hna thawktute a ti bawk.
Shah hian hel pawl hrang hrangte chu Suspension of Operations (SoO) zawm tha turin a ngen bawk a. “Dan bawhchhiat a nih chuan na taka chetin a zui nghal zel ang,” a ti.
Sorkar laipui hian kum 2008 daih tawhah khan Kuki hel pawl pahnih – United People’s Front (UPF) leh Kuki National Organisation nen chet lak lohna tura inremna, SoO hi an lo ziak tawh a. He pawl lian tak pahnih hnuaia awm pawl 24-te chu SoO ziah hian a huam vek a ni.
“Heng pawla tel hi mi 2,200 chuang an ni a. Inremna ziahpui an ni a; mahse, an ralthuam erawh an tung chuang lo,” tiin thuneitu pakhat chuan a sawi.
Shah-a’n Ningania chhui a ni dawn tih a puanah hian panel chu chief justice chawl tawhin a ho dawn a. Peace committee pawh larsapin hovin security advisor Kuldeep Singh leh vantlang pawla hruaitute member an ni ang.
Manipur-a chi leh chi intihbuaina hi March 3-a tlangram district-a ‘Tribal Solidarity March’ huaihawt atanga intan niin he march hi Meitei-ten Scheduled Tribe (ST) status an phut duh loh lantirna a ni a. Tharum thawhna thlen hma hian reserve forest-a cheng Kuki-te hnawh chhuah tuma chetna a lo awm tawh bawk.
Buaina hian a awh rei tawh a, Pathianni thleng pawh khan venhim hna thawktute leh hel pawl inkahna a la thleng reng tho a ni.