Aizawl: Deputy chief minister Tawnluia leh PHE department hotuten nimin khan PHE-in tun hnaia sorkar laipui scheme hnuaia lawmman hrang hrang an dawn puanzarna hun an hmang a, Dy CM chuan an lawmman dawnin mipuite hnenah a tha zawngin zirtirna nei se a duh thu a sawi.
PHE department-in lawmman an dawn leh an hmachhawpte puanzarna hun hi Dy CM office-ah neih a ni a, thuthar thehdarhtute hmaah thu sawiin, Tawnluia chuan National Award chhuanawm tak tak an dawng thei chu lawmawm a tih thu sawiin, “Heng kan lawmman dawnte hi mipuite hnenah hmasawn zel tura zirtirna tha tak petu ni thei se kan duh hle,” a ti.
PHE hotuten lawmman an dawnte an tar lang a, chungte chu Jal Jeevan Survekshan (JJS) hnuaiah Mamit district-ina ram puma Aspirational district zingah lawmman 1-na a lak te, Achievers for Performance Among Aspirational Districts category-a Mamit district vekin lawmman pahnihna a lak te, High Achievers Category-ah Kolasib district-in district 740 atanga titha zual 127 thlan chhuah zingah 3-na a lak bakah Fastest Moving District Achievers Category-ah Saiha district-in India ram district 740 atanga titha zual 168 thlan chhuah zingah 5-na a lak te a ni.
He huna PHE Engineer-in-chief Er Liantluanga’n a tar lan danin JJM scheme hnuaiah thingtlangah in 1,05,627 hnenah tui connection pek an ni tawh a, JJM scheme tan hmaa connection pek nen chuan a vaiin tui connection nei hi 1,14,823 an ni a, India hmarchhak state zingah a sang ber dinhmun a hauh a, Mizoram thingtlang khua 728 awm mekah khaw 316-ah in tinin tui connection an nei vek tawh a ni.
PHE department lawmman dawnte puan zarna huanah hian PHE minister aiawha lawmman dawngtu, Minister C Lalrinsanga pawh telin PHE dept-in lawmman tam tham tak ram pum huap an lak theih nana department hnathawh chu chhuanawm a tih thu a sawi a. Ani bakah hian SIPMIU programme director Er. Lalrothanga’n SIPMIU hmalakna hrang hrangte a tar lang bawk a ni.