Mizorama jail hrang hrangah HIV leh TB hri kai an tam hle a, India ram pumah Mizoram chu jail chhunga HIV leh TB hri kai tamna ber a ni.
June thla chhunga kalpui tur jail leh khuahkhirh ngai enkawlna hmuna HIV leh a kaihhnawih natna laka invenna campaign chu Ningani tlai khan Health Minister Dr R Lalthangliana’n SAD Conference Hall, MINECO-ah a hawng a, he hunaah Mizoram jail dinhmun hi tar lan a ni.
Health department hotuten an tar lan danin ram pum huapa tan ina HIV leh TB hri kai thar chhutnaah Mizoram dinhmun a sang ber a, hemi kuma India ram puma jail tang, mi nuai 62.9 zinga HIV leh TB hri kai za zela 1.93 a nih laiin, Mizoramah chuan jail tang zinga za zela 26-in HIV leh TB hrik an kai a, pahnihna Punjab chu za zelah 7.5 niin pathumna Nagaland chu za zela chhutin 4.6 an ni.
Mizorama tan inte dinhmun a tha lo hle a, jail chhungah hian a awm thei zat aia tam an awm fo avangin natna inkaichhawn theih lakah an dinhmun a him lo hle tih tar lan a ni.
Integrated STI, HIV, TB & Hepatitis (ISHTH) Campaign hawngtu Health Minister Dr Thangtea chuan Central Jail leh district jail-a tangte zingah HIV chungchanga hmalakna neih chu thil tul tak a nih thu sawiin, Mizorama central jail pakhat leh district jail neihahte tang thei tur zat aia leta tam an awm laiin hriselna lama hnathawktute indaih tawk loh vanga harsatna a awm thin thu a sawi a, department hrang hrangten tangruala hma an lakna tur ISHTH campaign chu thla ruk hnuah a rah chhuah duhawm a lan ngei a beisei tih a sawi.
ISHTH Campaign hi June thla chhunga hman tur a ni a, campaign-in a tum ber chu jail tang te, harsatna tawk leh khuahkhirh ngai enkawlna hmun hrang hranga awmte, HIV, TB, Hepatitis leh STI natna laka an inven theih nan leh natna neiten enkawlna tluantling an dawn theihna tura ruahman a ni.
He campaign hian jail tangte bakah Social Welfare & Tribal Affairs leh Women & Child Development ten an enkawl Home hrang hrang, Observation Home leh Ruihhlo ngai te enkawlna hmun pawh a huam tel dawn a ni.