Nikola Jokic leh Denver Nuggets ten NBA Finals khelh a nih hma in an champion thei ang em tih zawhna a tam viau a, hun pawimawhah an chetsual mai ring an awm.
Nimahsela kar khat leh a chanve lai an inkhelh loh hnuah an buai phah lova. An chetthat chhunzawmin 104-93 in Miami Heat chu NBA Finals game 1-ah an hneh.
Zirtawpni zingah 2023 NBA Finals khelh tan a ni a, Nuggets hi an team chanchin a finals an khelh vawikhatna a ni. An la dai ngai loh ram nimahsela an inkhel erawh a ngai reng a, offense-ah tihsual nei tam lova an khel thei thin chu an chakpui.
Game 1 Nuggets ta
Inkhel tan tir atangin Nuggets in pumraw lian zawk leh thahrui ngah zawk player an neih hnem an chhawr. Heat basket bulah tal na viau in Ball Arena-ah mikhual team Miami in an dang thei lo.
Inkhel tan tir atanga hma an hruaina a fal a, third quarter-ah point 24 in an sang fal hman.
Miami in fourth quarter-ah theihtawp an chhuah a, a tawp lamah an shooting kalin an point score in hma sawn mahse Nuggets lehthal theih an ni tawh lo.
Nuggets tan Nikola Jokic chuan NBA Finals a vawikhat khelhnaah triple double a nei nghal a. 27 points, 10 rebounds leh 14 assists neiin ball vawi 12 a shoot atang vawi 8 a lut.
Jamal Murray chuan point 26 leh assist 10 in a thlawp a, Aaron Gordon chuan point 16 thawh bawkin 3 points atangin team angin shoot tha lo mahse Miami ‘paint’ chhungah an tal na viau.
Miami tan Bam Adebayo chuan point 26 leh rebound 13 a la a. An tana che tha ber niin thiampuipa Jimmy Butler erawh a che thei lova, point 13 bak a score lo.
Miami sawi harh an ni
Kuminah finals an khelhphakna kawngah Miami chakna zing ami chu an star player Butler leh Bam te thlawptu ‘role player’ te an ni a. Zirtawpni zingah erawh an bo.
Gabe Vincent leh Haywood Highsmith te khel chhe lo mahse round hmasa lama fak hlawh thei em em Caleb Martin, Max Strus leh Duncan Robinson ten an thawhhlawk lo.
An pathum a belhkhawmin ball vawi 23 an shoot atangin point 6 chiah an score a. |um danga tangkai thin an 3 point shooting-ah pawh vawi 16 atang vawi hnih chiah an lut.