Prime Minister Narendra Modi chuan Inrinni khan rel chetsualna hmun thlenna hi a tlawh a, ‘tisualtu an awm a nih chuan a na thei ang bera hrem’ an nih tur thu a sawi.
Mihring phur rel pahnih, Kolkata atanga chhuaka Chenna pan, Coromandel Express leh Yesvantpur atanga Howrah pan, Howrah Superfast Express-ah te hian mi 2,000 vel an chuan rin a ni a, tawhsual hi zan dar 7:00 bawk vela thleng a ni.
Odisha Chief Secretary Pradeep Jena chuan ruang 187 chu tute nge an nih hriat mai theih a nih loh thu leh sorkar website-ah an thlalak tar chhuah a ni a, a tula en turin an DNA pawh en vek a ni tih a sawi.
Chhanchhuah hna thawh chu Inrinni khan thawh zawh tawh niin hnawk then chhunzawm nghal a ni a, rel tlan tantir leh tuma hma lak nghal mek a ni tih thuneitute chuan an sawi bawk.
India hi khawvela rel network lian ber pakhat niin ni tin mi maktaduai chuangin an chuang ziah a, rel leh a kaihhnawih thil hrang hrangte hi tihchangtlun mamawh tak a ni bawk.
India-ah hian tun ang hun hi rel chuang an tam lai tak a ni hrim hrim a, sikul chawlh lai a ni a, chawlh hmanga chhungkuaa zin leh mahni khaw lama haw an tam hun lai a ni.
India rama rel chetsualna thleng rapthlak ber chu kum 1981 kha niin mihring tawt taka chuanna rel chuan a kawng a zawh sual a, hei hi Bihar-a cyclone a thawh lai niin mi 800 chuang an thi a ni.