Myanmar rama sipai court chuan chanchinbumi pahnih chu chanchin thar an pek chungchangah thiam loh chantirin kum hnih chhung tan ina khung turin an chungthu a relsak.
Sipaite thutlukna hi mihring dikna chanvo humhalhtu hrang hrangte chuan an haw hle a, chanchinbu zalenna rah behna niin an sawi.
Lung ina khungte hi kum 31 mi, Aung Kyaw, Democratic Voice of Burma hnuaia reporter leh Zaw Zaw, kum 38 mi, Mizzima online agency tana freelancer-te an ni. Mipuite rilruah zauthauna pea buaina tipunluntu tia puh an ni.
Hetih mek lai hian, European Union-te chuan sipai hotute leh an company-te chu hrekna thar siamsak dan tur ruahmanna an siam mek.
Myanmar sipaiten kumin February 1-a mipui rorelna an hnehchhuh hunah chanchinthar buatsaihtute an dim lo hle a. Ram pawn leh tual chhung mite, an duh lo dana chanchinthar pe chhuak thin nia an ngaihte chu an man hmak hmak thin a ni.
March 9 khan an rama chanchinthar thehdarhtu lian panga – Mizzima, Democratic Voice of Burma (DVB), Khit Thit media, Myanmar Now leh 7Day News-te chu an license tihtawpsak an ni.
A hma niah Myanmar Now office chu police-ten luhchhuahin an computer, data server leh bungrua eng emaw zat an mansak.
Chanchinthar thehdarhtute bakah chanchinthar buaipui tura luh phalna an pek, CNN-in tual chhung mi an kawm mi 11 chu Yangon-ah man an ni bawk.
Facebook leh Youtube-te chuan Myanmar sipai kaihhnawih page leh channel zawng zawngte chu an khapsak ve thung a. TikTok pawhin sipaite fakna lam hawi reng reng video-te an paihsak bawk.