Aizawl: Congress Legislature Party (CLP) Leader Zodintluanga Ralte chuan thuchhuah a siam a. Mizoram sorkarin a hnuaia hnathawkte hlawh a pek chhuah tur thu ringawt pawh ruling party worker-ten sorkar fakna atana an hmang ta hian ram sum leh pai dinhmun chhiatzia a tilang chiangah a ngaih thu a sawi.
Zodintluanga Ralte chuan ram sum dinhmun a that loh chhanah ram sum leh pai enkawltu, chief minister-in Covid-19 a chhuanlam laiin Lengpui Airport thawm thatna atan te, a tuipui em em hlawhtlinna hmuh tur awm si lo rua leh mai atan te, Kamrul-a leh Zoramchhana tan te, a fa chuam Robert Romawia Royte state matching share tur sum a awm reng tih sawiin, “Mizo mipui nawlpui tana sum a harsat lai leh sorkar hnathawkte pawhin hlawh an lak mumal theih loh laiin tute emaw leh khawiah emaw atana sum a tam si hi thil dik lo tak a ni a, kan ramin a tuar mek a ni,” a ti.
Sorkar hnathawkten a hun taka hlawh an lak theih lohna a rei tawh a, chutihlaia sorkarin a hnathawkte hlawh tur a pek chhhuah ringawt pawh ruling party worker-ten intihtheihna atana an hmang hian sorkar dinhmun a hril chiang hle nia a hriat thu a sawi.
Zodintluanga Ralte chuan sorkarin IFMIS tifel lote tan hlawh a pe chhuak lo a, a chhanah central sorkar nawrna vang nia an sawi thin chu central sorkarin state-te ti tura a tih hi state hian harsatna a nei a nih chuan central-in a pawng nawr chiam ngai lo a, an inchin fel hun a nghak thin thu a sawi a. “IFMIS kalpuina atana cheng vaibelchhe tam tak seng chunga sorkar hnathawkte IFMIS-a an inthun luh zung zung theihna atana sorkarin hma a lak loh dan atang hian sorkar hnathawkte hlawh tur a hlawma pek chhuak tur a neih theih meuh tawh loh avanga IFMIS chhuanlamah hmanga ka ngai,” a ti.
Tun hnaia chawlhkar khat dawn treasury khar chiah si lo, khar tluka a awm hian sum dinhmun a chhiatzia a pho lang tih sawiin CLP leader hian, “Sum harsat chhanah Covid-19 an chhuanlam a, hri leng a reh hnu kum hnih velah pawh sum harsatnain ziaawm lam a pan chuang lo a, kan harsa telh telh zawk a ni,” tiin, chief minister hian sum leh pai a enkawl thiam loh piah lamah a duhsak zawngte a vur nasat avanga sum dinhmun hi chhe zawk a ni tih a tilang chiang hle niin a sawi a. Chief minister chu chhuanlam zawng kual loa sum leh pai dinhmun siam tha tura theihtawp chhuah turin a ngen.
“Kan ram mipui kan harsat tulh tulh lai hian kan CM leh a duhsak zawngte bank account a pung thur thurin kei chuan ka ring tlat, kan CM bik erawhin a account-a dah loin, a naute pawisa a kawl ang deuha thil a kalpui ka ring thung,” ti bawk.