RB Leipzig in German Cup chu a zawna vawi hnih nan an chawi nawn a. Final-ah 2-0 in Eintracht Frankfurt an hneh.
Berlin a Olympiastadion-ah final hi khelh a ni a. Team pahnihten fimkhur taka football an khelh avangin goal hlauhawm a tam lo.
Leizpig tan midfielder chhuanvawr Christopher Nkunku chu hnehna an channa chhan lian tak a ni a. Minute 71-naah vannei angreng takin an goal hmahruai a khung.
French international hian penalty area hmawr atangin goal-ah a shoot a. Defender pahnih perin Frankfurt goalkeeper Kevin Trapp tan dan ngaihna a awm lo.
Nipui a Chelsea zawm tura ngaih Nkunku bawk an goal hnihnaah a pawimawh leh hle a. Minute 85-naah Frankfurt defender ten uluk taka an veng chungin Dominik Szoboszlai tan ball fing tak a pe a, vengtu nei lo Szoboszlai hian goal-ah awlsam takin a khung.
Leipzig in hnehna an chan avang hian Bundesliga a parukna hauhtu Bayer Leverkusen an vanneih phah.
Season tharah Europa League an khel leh dawn tihna a ni.
Hetihlai hian hnehna chang se Frankfurt hian Europa League an khel tur a ni a, season liamta a champion te hian season tharah erawh Europa Conference League an khel dawn thung.