Manchester City in ‘treble champion’ ni thei turin ke an pen belh a. FA Cup final-ah an hmelma Manchester United 2-1 in an hneh.
Wembley Stadium-ah Inrinni zanah City in German midfielder Ilkay Gundogan hmangin goal hnih an khung a. Premier League title la tawhin tun Inrinni lo awm turah Istanbul-ah Inter Milan nen UEFA Champions League final an khel leh dawn.
Hun pawimawhah captain
Final inkhel pawimawh a ni a, Manchester City tan an mamawh huna inlar thin captain Ilkay Gundogan-a’n danglamna a siam.
City in goal khung turin hun an mamawh rei lo. Second 12 chauh an mamawh.
FA Cup final chanchin a goal dang ber ni turin Gundogan-a’n goal a khung a. Kum 2009 a Chelsea laka Everton striker Louis Saha in second 29 chhunga goal a khung chu a khum.
Manchester United an beidawng bik lo. Minute 33-naah an si phurh an sut. Jack Grealish handball avangin penalty an hmu a, Bruno Fernandes-a’n chiang takin goal-ah a khung.
Second half-ah erawh City bawkin goal an khung leh thuai a. Minute 51-naah Kevin de Bruyne freekick atanga ball kal chu Gundogan bawkin a ‘volley’ a. United goalkeeper David de Gea che rang tawk lovin City in goal an khung a. A vawi sarihna atan FA Cup-ah an champion phah.
Manchester City hian kum 1999 a Manchester United in an lo tih tawh chu ti ve thei turin match khat chiah an mamawh tawh.
Inkhel zawh lam
Manchester City manager Pep Guardiola chuan, “Tunah chuan treble kan sawi thei tawh. Champions League-ah hnehna kan chan ngei erawh a la ngai a, mahse tun season-ah kan khua leh kan fans te tan kan kheltha thin hle.” tiin a sawi a.
Inkhel chungchang sawiin, “Man-to-man in an khel a, khatiang tak khan an inrem tawm ang tih kan ring lo. Kha khan thil a ti harsa a, second half-ah khan hmunawl kan hmu ve thei deuh zawk chauh a ni.” a ti.
Manchester United boss Erik ten Hag chuan, “Tunah chuan kan keh sawm a ni ber. Kan result avangin na kan ti a, mahse he team hi ka chhuang hle. Kan khelchhe lova, goal ho tak pahnih erawh kan chhuah. Chak thei kan ni a, kan talbuai lova, City nen khan kan inkhel tawk hle.” a ti ve thung.