- Ruata
MG Comet Global Small Electric Vehicle (GSEV) platform nghahchhana duan Baojun Yep compact electric SUV khawvel puma hralhchhuah turin China-ah tlangzarh a ni a. He compact SUV thar hi India ramah MG brand hmingin a lo lut ve tura beisei a ni.
Design leh lenzawng
Comet EV ang deuhin Yep electric SUV hian boxy design a nei a, mahse a landan hi tlema lang hmanlai deuh, retro-themed a ni a, Maruti Suzuki Jimny leh Ford Bronco te nen a inang deuh a ni. A headlight-ah hian Porsche ang deuh graphics a awm a, unit tinah quad-LED daytime running lights a awm bawk a ni.
Profile-ah chuan Yep SUV hian wheel arche lawk tha tak a nei a, 15-inch alloy wheel a nei a, Comet EV ang lo takin asymmetrical rear windows a nei lo thung a. A hnung lamah chuan vertically tail-lamp design tung chi a nei a, tailgate-ah optional LCD screen – Car-Watch tia koh – a nei a a ni. Yep hi SUV te chi a ni a, a sei zawng hi 3,381mm bawr a ni a, a zau zawng hi 1,685mm a ni a, a san zawng hi 1,721mm a ni a, wheelbase hi 2,110mm a ni. Comet nena khaikhin chuan Yep hi 407mm-in a sei zawk a, 180mm-in a zau zawk a, 81mm-in a sang zawk bawk a, a wheelbase pawh 100mm in a sei zawk a ni.
Kentel hrang hrang
Yep compact SUV hian three-spoke design steering wheel a nei a. Steering-mounted control a nei bawk a. A kentel hrang hrang zingah hian twin-screen layout, 10.25-inch display pahnih – pakhat infotainment system atan leh pakhat digital instrument cluster atan a ni a. Hei bakah hian battery temperature management system, rear-view camera, hmalam seat heater, electrically adjustable driver seat leh USB port pali a awm bawk a ni. A man to ho deluxe trim-ah hian ADAS tech a awm dawn a, hemi hnuaiah hian adaptive cruise control, lane-departure warning, lane-keep assist, forward collision warning, blind-spot monitoring, 360-degree camera leh automatic parking assist bakah thil dang dang a awm a ni.
Smartphone app hmang hian a chunga kan sawi tak tailgate display bakah hian windows, air-conditioning, lirthei diagnosis leh lirthei positioning te chu thunun leh vil a theih dawn a. A hnung bungraw phurhnaah hian litre 35 hmun awl a awm thei dawn bawk a ni.
Electric khawl
Baojun Yep electric SUV India rama lo lut tura beisei hian rear axle-ah electric motor pakhat a nei a, hei hian 68hp power leh 140Nm torque a pe chhuak thei a, a top speed hi 100kph chauh a ni thung a. He power hi 28.1kWh lithium-ion phosphate battery hmanga pek a ni a, vawikhat charge full-in km 303 thleng a tlan thei a ni. DC fast charging hmang hian a battery hi minute 35 chhungin za zela 30-80 vel a charge thei a, hei hi Comet EV kan hmuh mekah chuan a awm lo thung a ni. Hetihlai hian AC charging hmang hian darkar 8.5 chhungin za zela 20-80 vel a charge thei a ni.
Baojun Yep EV SUV hi India ramah a rawn thleng dawn em?
MG India hian Baojun Yep compact SUV hi a rebadge (anmahni company hminga an tihchhuah) hnuah India chuan a hmu dawn a nih hmel a. MG hian Comet EV leh a hmanraw hrang hrang hi India ram chhung ngeia siamchhuah leh lakkhawm a tum mek a, Yep pawhin he hmalakna hi a hmang tangkai dawn a. Mahse report thenkhatin an tarlan danin Yep hi India rama tichhuak tur chuan MG India-in investment round hnihna a neih hun nghah a la ngaih hmel a, hei hi Gujarat-a Halol-a plant pahnihna tur an duan fel hunah a nih hmel a. Tunhnaivai lutukah chuan a lo la luh a rinawm loh a ni.
Hetihrual hian electric lirthei lama hmasawn mek India ram lirthei industry thuthar pawimawh lutuk erawh a ni a, India ram hian electric lirthei lam hi nasa takin a hawi mek a, tuna mi pawh hi helam kawnga company te hmalakna pawimawh tak a ni.