Olympic medalist Sakshi Malik chuan Inrinni zana Union Home Minister Amit Shah nena an inkawm chu ‘thil sawiho pangngai’ a nih thu sawiin an thil phut chu a la ngai reng tih a sawi.
Wrestler langsar tak takte hian Wrestling Federation of India (WFI) chief, BJP MP ni bawk, Brij Bhushan Sharan Singh-a chu hmeichhe infiam mite laka mipat hmeichhiatna lam hawia mawi lo taka chea puhin a bân leh man an phut.
“Inbiakna pangngai a ni a, engmah chin fel a awm lo. Kan duh chu a la ngai reng a, kan mi duh loh hi man a ni,” tiin Malik-i chuan news agency ANI hnenah a sawi.
Malik leh Bajrang Punia balah Olympian leh World Championship medallist Vinesh Phogat te chu Singh-a lungawi lohna lantirtu langsar an ni a. Wrestler pasarih, pakhat phei chu kumtlinglo lakah mawi lo takin a che niin an puh a, Singh-a hian a pha thung.
“Kan hming thai bo a ni dawn lo va, Vinesh, kei leh Bajrang te hian inlungrual takin lungawi lohna leh phutna kan la lantir zel dawn a, kan hming thai bo a ni dawn lo,” tiin Malik hian ANI a hrilh.
Shah-a hian tun hi wrestler-ten thla khat chuang lungawi lohna an lantir hnua a biak vawi khatna niin zan rei tak thleng an inkawm a. A hmain wrestler-te hian Sports Minister Anurag Thakur kawm tawhin an puhna thilte chu ‘fair taka chhui’ a nih tur thu a lo hrilh tawh.
Shah an kawm hma ni rei vak lo liam taah khan wrestler-te hian Haridwar panin ram tana medal an lo lak tawhte chu Ganga luia paih an tum a; mahse, lo neitu hruaitu, Rakesh Tikait-a’n sorkarin Singh-a an man theih nana nawrpuiah sawmin June 9 thleng nghak tura a ngen angin an paih ta lo.
Malik-i’n thuthar lakhawmtute a kawm hi chanchinbu thenkhatah wrestler-ten lungawi lohna an lantir an titawp nia tar lan a nih hnu lawkah a ni.
A hma lawkin Malik-i hi Delhi-a Northern Railways pisaah hmuh niin lungawi loh lantir titawpin a hna a zawm leh tawh nia sawi a awm hman a ni.
“Titi mai mai a ni, kan la kal reng. Pisa-ah hian hna thawh zawh loh a awm a, engtin nge tharum tel si lova hma ka lak zui dawn tih ngaihtuah ngai nen ka kal a ni,” tiin a sawi.
Malik-i hi Indian Railways-ah hian Special Duty (Sports) officer a ni.