Indian railway ministry chuan an rama hnuchhuitu pawl tha ber chu tun hnaia mi 275 zet thihna rel insutna thleng chhui turin an ti.
Railway Minister Ashwini Vaishnaw chuan thutlukna hi a puang a, a sawi zui thui lo thung.
Railways-in a chhuina erawh tan a ni tawh a, tuna an hriat chinah chuan signal pek fel lo vangin rel pathum insutna hi thleng ni ngeiin an ngai a ni.
Zirtawpnia zan thil hlima Balasore district, Odisha-a rel insu hi tun kum zabi kal meka India-a rel chetsualna rapthlak ber nia sawi a ni.
Thi tam tak bakah mi 1,000 chuangin hliam an tuar a, damdawi inah lak an ni a. Chhungkaw tam takin an chhungte chinchang an la hre lo bawk.
Ministry hnuaia thuneitu sang ber, Railway Board-in chhui hna mi dangin an thawh mek tawh laia Central Bureau of Investigation (CBI) chhuitir tura thu a tihtluk chhan hi hriat a ni rih lo.
CBI hian pawikhawihna lian tak tak a chhui thin a, heng zingah hian sum leh pai tihchingpenna leh thihna maksak deuhte pawh a tel.
Vaishnaw-a chuan Pathianni khan rel insut chhan ‘bulpui ber’ an hriat tawh thu leh tute nge mawhphurtu pawh hriat an ni tawh tih a sawi a, dan anga hma lak a nih tur thu a lo sawi daih tawh.
Signal pekna atana ‘electronic interlocking system hman’ chu a bul ni thei a nih thu a sawi bawk a. Minister hian a finfiahna leh a tak tak erawh nghah a la ngaih tur thu a sawi bawk.
Railway Safety Commissioner-in vantlang hriat turin a puang thuai ang a, chutah chuan a chiang dawn niin a sawi bawk.
Hetih lai hian railways chuan Pathianni khan Coromandel Express lu (engine) leh a hnunga pindanten signal pek dan fel tawk lo vangin bungraw phur rel an su niin an sawi.
Railways hian signal pek nan electronic interlocking system hmangin hetah hian rel tin hi an kalna tur kawng ruahman sa (set) vek a ni a, hei hi an kawng zawh mi dangin an zawh ve loh nana tih a ni.
Coromandel Express-in bungraw phur rel a sut hnuah hian a pindan thenkhatin a kawng zawh sualin an tlu a, an sira kawng danga lum lutin anmahni tawk zawnga he kawng zawhtu Bengaluru-Howrah Superfast Express chuan chak taka a tlan laiin pindan lette hi a su ve ta a ni.
Mihring phur rel pahnihah hian mi 3,000 chuang an chuang ngei tura ngaih a ni.
National Disaster Response Force (NDRF) chief Atul Karwal chuan an insut hnuah hian pindan tam tak chu a sawi bawih bawih hlawm niin a sawi a. Chhanchhuah hna thawktute pawhin mihring la chhuak turin pindan bangte chu an zai thler niin a sawi.
Chetsualna thlenna hmunah hian ambulance, doctor, nurse leh chhanchhuah hna thawktu tam tak tirh luh nghal niin darkar 18 chhung chhum lo chat lovin an thawk.
Pathianni zan khan Vaishnaw chuan rel chetsualna hmun hi then fai ni tawhin rel pawh dan pangngaia a tlan tan leh tawh thu a sawi.
Hetih lai hian chin hriat loh pawh an la awm nual nia sawi a awm ve mek bawk.
Eptu party hruaitute chuan Vaishnaw chu he chetsualna thleng hi a mawhphurhnaa lain a nihna atanga bâng turin an ti.
Hetih lai hian rorel lai, BJP chuan chetsualna thleng chu politics khelh nana hmang lo turin an chah ve bawk.