Aizawl: Manipur buai vanga sahimna zawnga Mizorama lutte enkawl dan tur ngaihtuah tura sorkarin a ruat, High-Level Committee on Internally Displaced Persons of Manipur in Mizoram chu an chairman Lalchamliana, Home Minister hovin nimin khan Directorate of Forensic science Laboratory Conference Hall, MINECO-ah an thukhawm.
Meeting kaihruaitu chuan Manipur buai vanga Mizorama raltlante dinhmun tlangpui a sawifiah a, Myanmar leh Bangladesh atangin tun dinhmunah raltlan 50,000 chuang dawnsawn mek a ni a, COVID vanga harsatna tawhin ziaawm lam a pan mek laiin Manipur-a an unauten harsatna an hmachhawn leh a, an hnuchhawn thiang lo va, sorkar sum dinhmun leh hmanraw neihte pawhin tuar deuh dawn mah se an unaute an nih bakah COVID hripui len lai pawha Mizo tlawmngaihna nen hmangaih taka lo tanpuia lo thlamuantute an nih vangin theihtawp chhuahin an lo buaipui zel dawn tih a sawi.
Meeting-ah hian member-te an kal tha hle a, sorkar department hrang hrangten hma an lo lak tawh dan an report a, Central YMA, MKHC leh MJA aiawhte pawhin hma an lo lak tawh dante tar langin hmalak chhunzawm zel dan tur rawtna sawiho a ni.
Meeting hian resolution siamin “Kan unau Manipur atanga raltlante hian ei leh bar leh tawmhulna ah harsatna an neih lohna turin theihtawpa tanpui zel nise” an ti a. Raltlan rawn lut te chhinchhhiahna mumal leh felfai taka siam turin data tha neih ngai an ti a. ICT Department lamin Management Information System (MIS) lo buatsaih se tih a ni a. Chhungkhat laina belh tur nei lote awmna tur sorkar hmunhma hman mek bakah hmun dang ngaihtuah belh nise tih a ni a, Manipur buaina hian eng chen nge a awh dawn tih hriat a nih loh vangin sawrkar hmunhma bakah hmun remchang dang te pawh lo thlithlai lawk nise an ti a. Raltlan zingah sikul naupang te chu zirna in hrang hrangah document phut lova admit turin School Education department lamin thuchhuah an lo siam tawh a, hetiang deuh hian College zirlai te zir chhunzaw dan tur ruahman a tul thu sawi a ni a, raltlan te hriselna endik a uluk taka vil zui a that thu sawi ni bawkin Executive Committee Committee on Internationally Displaced Persons of Manipur in Mizoram ten chak takin hma an la chhunzawm dawn a ni.
Committee thukhawm hian Chief Minister Zoramthanga’n Manipur atanga raltlan te chhawmdawlna tura Prime Minister Narendra Modi hnena sum a dil chu rang taka bawhzui turin tirh tha an ti a, raltlante chhawmdawlna kawngah tlawmngai pawl te, kohhrante leh mi tinte inphalzau turin an ngen bawk a ni.
High Level Committee on Internally Displaced Persons (IDPs) leh Executive Committee on Internally Displaced Persons (IDPs) of Manipur in Mizoram member ruat belh tha tih a ni a. Meeting-ah hian School Education Minister Lalchhandama Ralte, I&PR Minister Lalruatkima leh Tourism Minister Robert Romawia Royte te an tel a ni.