- Mahmuaka Chhakchhuak
Indian Film Star tam tak zingah Shak Rukh Khan hi thalaite ngaihzawn rawn ber tih theih hial tur a niin a film channa atang hian sum leh pai pawh a hlawhchhuak hnem tawh hle. Mizo thalaite pawhin kan ngaina viau pawhin a hriat a, Film Actor tam tak zingah a hming hi kan dah langsar viau a ni. A pianpui hming atan hian Shahrukh Khan tia vuah ni mah se, amah zawk chuan a hming chu Shah Rukh Khan tia ziah chu a duhin a lamtawi a SRK tia sawi leh ziah a ni thin.
Shah Rukh Khan hi November 2, 1965 khan New Delhi-a Muslim chhungkua atangin alo piang a. A pian tirh atanga kum nga chhung chu Mangalore-ah a hmangin hetah hian a nu lam aṭanga a pi, Iftikhar Ahmed chuan kum 1960 chhoah khan Lawng chawlhhmunah Chief Engineer hna a thawk a. Chumi hnuah chuan New Delhi khawpui Rajendra Nagar vengah a seilian a. A pa hian sumdawnna hmun engemaw zat a nei a, Restaurant pawh neiin, an chhungkua hian Apartment Rent-ah middle-class nun an hmang a ni. SRK hian lehkha a zir lai chuan Delhi khawpui laihawl-a St. Columba’s School-ah lehkha zirin, chutah chuan a zirlai bakah infiamna lamah pawh Hockey leh Football-ah te a hlawhtling hle a, he school-a chawimawina sang ber, Sword of Honour a dawng nghe nghe a ni. A tirah chuan SRK hian infiamna lama Career neih a tum a, chutihrualin a ke ruh a hliam avangin a inkhel thei tawh lo a, chu ai chuan a tleirawl lai atanga alo tih ve zauh zauh thin stage play-ah chan a tum leh ta zawk a. Bollywood Actors zinga a duh ber chu Dilip Kumar, Amitabh Bachchan leh Mumtaz te an nia, an tih dan hi a zir nasa thin hle a ni. A naupan laia a ṭhian leh acting partner zinga pakhat chu Amrita Singh a ni a, Bollywood actress a ni.
SRK hian Economics lama Bachelor degree zir turin Hansraj College (1985–88)-ah a inziak lut a, mahse a hun tam zawk chu Delhi-a Theatre Action Group (TAG)-ah a hmang thung, chutah chuan theatre director Barry John-a kaihhruaina hnuaiah acting a zir a. Hansraj hnuah Jamia Millia Islamia-ah Mass Communication lamah Master degree a zir leh a, mahse a zir chhuah hmain acting career zawm turin a chhuak a. Bollywood lama a thawh tirh lai khan Delhi-a National School of Drama-ah pawh a zir a ni.
A pa chu kum 1981 khan Cancer vangin a thi a, a nu pawh chu kum 1991 khan zunthlum natna avangin a thi leh bawk. An nu leh pa thih hnuah a farnu upa zawk, Shahnaz Lalarukh (1960-a piang) chu depression nasa tak a neih avangin SRK chuan a enkawl a. Shahnaz hi a unaupa leh a chhungte nen Mumbai-a an In ropui takah an khawsa chhunzawm zel a ni. Shah Rukh Khan Indian Actor leh film producer a niin, Hindi film-ah a thawk a. Media lamah phei chuan “Baadshah of Bollywood” leh “King Khan” tia sawi a ni a, film 90 chuangah a chang tawhin, chawimawina tam tak a dawng tawh bawk a, Filmfare Award pawh 14 lai a dawng tawh bawk. India civil mite hnena chawimawina sang Padma Shri pawh a dawng tawh a, France sorkarin Ordre des Arts et des Lettres leh Legion of Honor an hlan tawh bawk a ni. SRK hian Asia leh khawvel puma Indian Diaspora-ah follower pawimawh tak a nei a, entu tam leh sum lakluh lamah chuan khawvela film star hlawhtling ber pawla sawi a ni. A film tam takah chuan Indian hnam nihna leh Diaspora community nena inzawmnate, gender, racial, social leh sakhaw lama inthliarna leh lungawi lohna te chu thupui atan a hmang thin a ni.
SRK hian kum 1980 tawp lam khan television series eng emaw zatah a inlan ṭan a, kum 1992 khan Deewana nen Bollywood-ah a inlanin chu chu Television Series-a a inlan hmasak berna a ni. A tirah chuan Baazigar (1993) leh Darr (1993)-ah te villainous role a chan avangin hriat alo hlawh tawh thin bawk. SRK hian romantic film hrang hranga sum lalut hnem ber pawlah a chang a, chung zingah chuan Dilwale Dulhania Le Jayenge (1995), Dil To Pagal Hai (1997), Kuch Kuch Hota Hai (1998), Mohabbatein (2000), Kabhi Khushi Kabhie Gham (2001) te pawh a tel, Kal Ho Naa Ho (2003), Veer-Zaara (2004) leh Kabhi Alvida Naa Kehna (2006) te an ni. Devdas (2002)-ah zu ruih hmangah changin, Swades (2004)-ah NASA scientist lemah a tang bawk a, Chak De! India (2007)-ah Hockey Coach lemah changin My Name Is Khan (2010)-ah Asperger syndrome vei mi pakhat lemah te a chang tawh a ni. Romantic Drama: Om Shanti Om (2007) leh Rab Ne Bana Di Jodi (2008)-ahte pawh hlawhtling takin a chang tawh bawk. Comedy lam hawi flim; Chennai Express (2013) leh Happy New Year (2014)-ah te pawh a hlawhtling zel tho bawk a ni. Hun rei vak lo a han tlachhe leh zawk a, a han chawlh vang vang hnuin Action Film Pathaan (2023) hmangin a career ngai bawkah a rawn kir leh a, Hindi film Release zinga sum lalut hnem ber pahnihna dinhmun a rawn luah leh nghal thei a ni.
Kum 2015 thleng khan SRK hi motion picture production company Red Chilies Entertainment leh a hnuaia company-ahte Co-Chairman a ni a, Indian Premier League Cricket Team Kolkata Knight Riders leh Caribbean Premier League Team Trinbago Knight Riders-ahte Co-Owner a ni bawk. Media-te chuan “Brand SRK” tiin an vuah fo ṭhin a, a chhan chu endorsement leh entrepreneurship ventures tam tak a neih vang a ni. Television lamah presenter a ni fo bawk a, stage show-ah pawh a perform fo bawk. SRK hian midang tanpuina kawngah pawh sum leh pai a pechhuak fo thin a, a bik takin hriselna lam enkawlna leh chhiatrupna thleng thinahte chhawmdawlna a pe thin. Kum 2011 khan UNESCO-in naupangte zirna atana a inhman nasat avangin Pyramide con Marni Award an hlan a, kum 2018 khan World Economic Forum-in India rama hmeichhiate leh naupangte dikna chanvo humhalhna kawnga a thawhhlawk avangin Crystal Award an hlan bawk. India culture-a mi pawimawh ber berte list-ah a lang fo a, kum 2008 khan Newsweek chuan khawvela mi thiltithei ber sawmnga zingah an lo thlang tawh bawk a. Kum 2022 khan Empire-in readers’ poll a neihah SRK hi Actor ropui ber 50 zingah thlan alo ni tawhin, kum 2023 khan Time Magazine chuan khawvela mi pawimawh 100 zingah a thlang leh bawk.
SRK hian kum ruk chhung zet an inngaizawng hnuah October 25, 1991 khan Punjabi nula hmeltha Gauri Chibber nen an innei a. Kum 1997-ah Fapa Aryan neiin, kum 2000-ah fanu Suhana an nei leh a, kum 2013 khan fa pathumna an nei leh bawk. An fa pathumna AbRam hi chu surrogate kaltlanga piang a ni. An upate pahnih hian entertainment industry-a luh an duh thu an sawi thinin SRK chuan California-a USC School of Cinematic Arts-a filmmaking zir mek Aryan hian writer-director nih a tum thu a sawi a. SRK Film Zero (2018)-a Assistant Director hna thawk tawh an fanu, Suhana erawh chuan zirna sang zawk zir turin NYU-a Tisch School of the Arts-ah drama leh acting a zir thung. Suhana hian November 2019 kha acting lama a inlan hmasakna ber a ni a, film tawi chi “The Grey Part of Blue”-ah a ni. SRK sawi dan chuan Islam sakhua a rin tlat laiin a nupui sakhua pawh a ngai pawimawh hle. A fate chuan sakhaw pahnih hi an zui a; a chenna inah chuan Qur’an hi Hindu pathian Murti bulah a awm reng thin a ni.