Aizawl : AH & Vety Minister Lalrinawma’n nimin khan Tuirial-a Animal Shelter leh JB Paws Veterinary Hospital te a tlawh a, thawktute nen an a kawm.
Minister chuan chhan chi hrang hrang avangin miin an ranvulh te an vulh chhunzawm theih loh chang a awm thin thu sawiin, chumi piahlamah ran te chunga hleilen ching leh rawng taka che thin an awm bawk thu a sawi a. Ran khawngaihthlak tak tak te lo enkawl tura JP Paws-in Animal Shelter an siam chu a ropui a tih thu a sawi.
Minister chuan ran vulh enkawl dan leh inthlahpuntir dan te awmze nei taka kalpuia, inzirtirna pawh uar a tul thu a sawi a. Ran thlahtir teuha, a enkawltu an awm leh si loh chuan ranvulh awmna mumal nei lo an awm phah a, an tan a himlovin an hriselna thlengin a nghawng thei tih a sawi.
Lalrinawma chuan ran ngainat chu thil siam zawng zawng te hmangaih tura tih kan nih avangin kan rinna nen pawh a inrem hle, a ti a. Ran mai bakah sava leh ramsa te pawh humhalh kan uar sauh tur a ni, a ti bawk.
Secretary, AH &Vety Lalzarmawii pawhin thu sawiin Vety Department in Minister ran ngainatu tak an nei nia sawiin, lawmawm a tih thu a sawi a. JB Paws chungchang sawiin, an hnathawh a ropui a tih thu a sawi.
JB Paws Foundation hi kum 2016-a din niin, tun thlengin theihtawpin ran baihvai tak tak te lo humhalhin an chenna tur leh ei tur te an lo buatsaihsak thin a. Rescue operation, animal birth control ,adoption program, hospital a enkawl leh education leh awareness program pawh an kalpui bawk a ni.