DP&AR (GGC) leh ATI tangkawpin an buatsaih ni thum awh, ‘Training on Sevottam For Nodal Officers of CPGRAMS’ chu nimin khan Administrative Training Institute (ATI), MINECO-ah khar a ni.
Training hi Nilaini khan R.Lalramnghaka, IAS, Secretary, DP&AR-in a hawng a, a kharna hun hi a hmanpui leh bawk.
Training thupui kengtu, ‘Sevottam’ tih hi thu mal pahnih Seva (service) leh Uttam(excellent) atanga piang a ni a, heng thumal pahnih hi zawmin a saptawng chuan ‘excellence in service’ tih a ni a. Mipui rawngbawlna/hnathawh tha thei ang ber pek chhuah hi a tum ber a ni.
Sevottam hi Department of Administrative Reforms and Public Grievances(DARPG), Govt of India-in a duan chhuah a ni a, khawvel hmun hrang hranga kalphung leh tihdan tha a zir atanga duan a ni.
India ram chhunga sorkar peng hrang hrangten an hnathawh kawngah hma an sawn zel a, a tha ber an thlen theih nana hma lak hi a tum a ni.
Training-ah hian Mizoram sorkar department hrang hrang aiawh officer 150 an tel.