- Lallunghnema, Charity Lodge
Tun hnaia ka article-ah te khan Bus Conductor pakhat leh Bus neitu hrem an nih thu ka sawi a. Khang BUS NEITU LEH CONDUCTOR HREMNA kha,a chhan chu an passenger-te an ngaihsak that loh vang a ni.Mizoramah hian bus passengerte hian bus conductor leh driverte hi an dik lonaah kan khing let ngam ve ang em?
Kei hi ka â fal deuh thin a Busa ka chuan ve changte hian conductorte leh driverte zinga hawihhawm lo deuhva ka hriatte chu khak mai ka ching thin a. Ngaihdam min dil ta hial pawh an awm a ni.
‘ti hian i ngaihtuah ngai em le? Pathian nung ring lotute hi keini Kristian inti ai hian an firin an khawng zawk a. Thu dik leh rinawmna an ngai pawimawh hle a. Mihring hlutna te pawh hi an chawisang viau zawk niin a lang. Consumer issue-ah an chiang em em a.Service Providerho leh Dawrkai ho lakah an thik thu a chhe thin hle bawk.
Vaiho chuan Consumerte tana din Consumer Commissionte chu an chhawr tangkai a, huaisen takin thil hralhtute an hmachhawn ngam a. A tul chuan Consumer Commission-ah complain te an thehlut mai thin a ni. Mizo te erawh hi chuan mi pawi sawi kan hlauh avangin kei mahni dikna leh chanvo pawh kan buaipui ngam lo a ni ber a. Chutianga huaisen taka mipui chanvo au chhuah puitute pawh chu kan dem lek lek thin a ni. A dawihzep tawk chiahin ‘Isua hnung kan zui ni pawhin a hriat theih hial a ni. Tunah zet hi chuan kan rilru kan siam thar a tul ta hle mai. Sawi leh thin ila, Consumerism hi kan kalpui chak loh avangin kan tuar a, consumerism kan kalpui chak hian kan changkang zel ang tih hi i ring ngam ang u. Sawrkar pawh a inenfiah a ngai ngei ang. Chutiangin harhna dika kan harh a ngai tawh tak zet zet a ni.Eng tin nge kan harh chhuah ang tih hi zawhna awm fo a ni.
Hetiang hian kan harh chhuak ang :-
1) Thil lei tur ngaihtuah lawk a tha.
2) Thil lei tur list fel taka siam a tha.
3) Thil lei tur man(price) a tlangpui tal hriat tur.
4) Thil lei laiin uluk taka ngaihtuah tur. Hmanhmawh tur a ni lo.
5) I thil lei laiin lal i ni tih inhre ran ang che.
6) Hawihhawm takin seller te chu, “Ka Pi, Ka Pu” ti thin rawh.
7) ‘Khawngaih takin’ tih leh ‘ka lawm e’ tih bansan suh.
I thil lei tur chu:
1) A him dam em?
2) Expiry date en rawh
3) Manufacturing date en rawh.
4) Buk a tling em?
5) A thatna leh thst lohnate leh a nghawng te.
I thil leinaah chuan:
1) Cash memo/Receipt/Voucher la thin ang che. Theih nghilh suh.
2) Bungraw man price MRP etc en chiang rawh.
3) MRP aisa sangin thil lei loh tur tih hi vawng tlat rawh.
Complaint ka dawn zinga pakhat chu hei hi a ni mauh mai!
“Lehkhabu Dawr pakhat atangin zirlaibu Rs 170/- man chu printed price inziak thai chhia in, a price phuahchawp Rs 300 bel chu ka lei a. Hei hi dan a ni reng em? Consumer complaint a thehluh theih em?
Chhanna : Hetiang a MRP thai chhia a, a man phuah chawp bel hi Dan kalh a niin Dan bawhchhiatna a ni a. The Consumer Protection Act 2019 leh The Legal Metrology Act 2009 and Rules 2012 hmangin hetiang Dawrkai ho hi hrem theih an ni.Lehkhabu zuartu, Kristiante chu MRP phuahchawp nen hian an inhmeh lo hul hual a ni.
Ka message dawn zinga pakhat chu hei hi a ni.
“Mizofed -ho hian an petrol/diesel a validity an siam hi sawisel teh u. Advance- in pawisa kan pe zawk a ni a. Dik tak chuan kan petrol/diesel hi an ba zawk a ni. Chutih karah validity lo siam hi an thiam lo hulhual. Interest kan claim lo va, an vannei zawk!
Hmanni khan ka driver-in diesel a va lak tumin a validity a tawp tawh a, thla thar atang chuan 25% kan cut tawh ang” te an lo ti a ni awm e. Consumer lam atangin “aw” han nei zauh ula, ka ti khawp mai. Hetiang a nih chuan company dang kan dawr sup sup ang a, an ‘cha’ der mai tur zawk asin”
He message hi kan thianpa Engineer pakhat hnen atanga ka dawn a ni a.Thahnemngaihna aw a ni e.
Mizofed -ho hi service provider an ni a. Mipui tana thawk an ni. Anmahni dawrtute hi consumer an ni. Petrol Pump atangin petrol/diesel an hralh chhuak thin bawk a. Hlep nei tura sumdawng an ni. An customer -te tel lo chuan an sumdawng thei lova. Customer an neih that(tam) chuan an hlawhtling a ni mai a. Anmahni dawrtute chu tha tak a lo be tur an ni a. An Lalte an ni, kan ti a ni.
Tuna message ka dawn hi umzuiin an MD biak ka va tum a. Kan inbe remchang thei ta lova … Validity tawp hnua 25% cut chungchang hi zawh ka tum a ni. Chutiang a lo nih pawhin eng harsatna nge an neih tihte leh an dan neihte siam that a ngai hial em? tihte chu zawh ka duh a ni. Consumer thlirna tukverh atang chuan leitute leh hmangtute hi Lal an ni a, zuartute leh hralhtute chu chhiahhlawh an ni.
Consumer-te beng tivartu atan hei hi ka’n zep lawk teh ang.India ram puma consumer complaint dinhmun hetiang hi a ni (as on 14.March.2023)
- Consumer Commission: National Consumer Disputes Redressal Commission awm zat 1(one)
2.State Consumer Disputes Redressal Commission awm zat: 36(thirty six).
3.District Consumer Disputes Redressal Commission awm zat :691(six nine one)
Kum 2022 chhunga complaint lut zat :1,82248 (one,eight two,two,four eight).He Mizoramah hian case engzat nge an dawn ka hre lo.Sawi tham a tlng lo leh ngei ang.
Complaint chi hrang hrang zingah ‘bungraw chhia,hman tlak lo chungchang a tam ber e’,tih a ni.
Karleh Thawhtanniah chuan Pathianin rem a tih chuan Tui chungchang kan sawi sawp ang. Tui in leh hmang thin, sum sengtute hi consumer an ni tih hi hre phawt mai ila.