Hunthar in vawi hnih an inlannaah hnehna an chang nawn leh a. Tata SK 712 Pro Volleyball League-ah Durtlang North nen inkhelin 28-30, 25-19, 25-23, 25-22 in hnehna an chang.
Inrinni zana R. Dengṭhuama Indoor Stadium a inkhelab Hunthar hi set hmasa ber an hloh hnuah an insiamtha a. Set thum la zawnin league kal mekah vawi hnih khel tawhin an chak zawn.
Kum 2017 leh 2018 champion Hunthar tan Laldensanga leh Lalnunfela’n fel fai takin an khel a, hun pawimawhah Gagandeep Singh a rin tlakin a ṭangkai hle bawk.
Densanga hian point 16 hmu in point khat a hloh a, D3 Business Player of the Match a thlan a ni.
Tun season Pro Division inelna vawi hnih awm tawhah Hunthar an champion ve ve a; season kharna leh Mizoram inelna sang berah champion tura rin hlawh ber ni mekin, an hlawhtling a nih chuan trophy pathum nen kum kharin a vawi thum nan Pro Volleyball-ah an champion dawn bawk a ni.
TNT lakah set la lovin champion lai Durtlang North an tlawm tawh a. A hma aia el thamin khel mah se an tlo tawk lo va, boruak sangah hriam leh zuala inlan thei turin puitling leh paukhauh zawka khelh theih an mamawh.
Durtlang North tan a khelh hmasak berah Anup D Costa chuan beisei a pha lo hle na a; tun dinhmuna team ṭha leh nghet ber Hunthar lakah langsar takin a khel a, Johan Vanneihtluanga, Fabian Lallunghnema leh Vanlalṭanpuia’n an khelh hmasak aiin mi malin hma an sawn bawk. Mahse, vawi hnih an khelh tawhah an tlawm zawn avangin khelh thum an la neihah semifinal lut thei turin an hmabak a hautak dawn.
Thawhlehni zanah chak ngei ngei mamawh chungin Durtlang North-in Chhinga Veng Spikers an khelhpui leh dawn a; June 17, Ningani zanah Huntharin kaithar Tuipuiral an hmachhawn ve thung ang.
Luangmual pawh an chak nawn
Inrinni tlai hmeichhe inelna lamah Luangmualin Pro Volleyball League an khelh hmasak berah title chuh phak an nihzia chiang zawkin an lantir thar leh a, champion lai Bethlehem Vengthlang lakah set thum an la tlang nghal.
Chawhnu lam inkhelah 25-22, 26-24, 25-14 in Luangmual hi an chak.
Haryana tleirawl Nipa Barad chuan Luangmual tan vawi hnih a khelhnaah point 31 hmuin ṭum kua a hloh a, a hma ang bawkin D3 Business Player of the Match lawmman dawng lehin Luangmual a chak zawnpui bawk a. Lalmuanpuii’n point 16 hmuin Hmingṭhazuali vawi ruk a vaw tla a, ṭum hnih ve ve an tisual.
Luangmualin vawi thum chak zawn tumin Nilaini tlaiah Bungkawn an tum dawn a, Thawhlehni tlaiah Bethlehem Vengthlangin semifinal an beiseina tihnun tumin Durtlang an hmachhawn ve thung dawn