Philippines hmarchhaka an ram tlangkang lar tak, Mayon chu a irh chhuah thar leh mek avangin a hnaiha cheng mi 13,000 vel hmun himah an insuan chhuak.
Lorry leh bawngin a hnuh tawlailir hmangin ‘permanent danger zone’ an tih, tlang atanga km ruk biala chengte chu hmun hla zawkah an inphur chhuak a ni.
A pianhmang conical ang dik thlap a nih avanga tlang lar tak, Mayon hi kar hmasa atang khan a kang a inphuh chhuak leh tan a ni.
Mihring inthiar chhuah tak erawh kartawp atang khan tan chauh a ni a, a nasa telh telh a, inralrin a ngaih tak vang a ni.
Mayon hi nasa zawka a inphuh chhuah zel chuan mi tam zawk inthiar chhuah a la ngai dawn niin an rama chief volcanologist Teresito Bacolcol chuan a sawi.
Tunah hian inralrinna dar hlauhawm dan chhawng nga an neiha a pathumna an khawng mek a, hei hi mihring tana him lo thil inphuh chhuak leh puak thei pawh a awm theih avanga inralrinna a ni a. Scientist-te chuan muangchangin a inphuh chhuak zel dawn niin an sawi.
Lo neihna hmun thliarkar, Bicol an tiha awm, Mayo hi an rama tlang kang reng zinga pakhat leh inphuh chhuak zing ber pawl a ni a. Chawlhkar tam vak lo liam ta atang khan lirnghing a siam a, a inphuh chhuahna kua atangin lung pawh a lum fo a ni.
“Tlang kang khu leh lung tam tak a khur atang hian a chhuak chak hle a ni,” tiin Bacolcol chuan tual chhung chanchinbu mite hnenah a sawi a. “Tunah rih chuan a chet zel dan tur hriat a har,” a ti bawk.
Kum 1814-a a inphuh chhuah vang khan mi 1,200 vel thiin khaw pum chhilh pawh a nei a; mahse, tun hnai, kum 2013 leh 2018-a a inphuh chhuah thar lehah kha chuan a huam a zim tawhin thi pawh an tlem tawh a ni.
Mayon hi Philippines-a tlangkang 24 an neih zinga pakhat a ni a. Tun hnaiah a dang pahnih, Taal leh Kanlaon chu inphuh chhuak mai theia sawi niin inrin a ni.
Tun hnaia inphuh chhuakah erawh thi an tam ngai tawh lo va, typhoon na tak tak an tawrhten chirh sa luang chhuak leh phuh chhuakte a tinep deuh.
Kum 2006-a Typhoon Durian thawk khan Mayon panga a kang inphuh chhuak, khaw eng emaw zat chhilha mi 200 chuang an thihna pawh a len fai thei a. Hetih lai hian kum 2020-a Super Typhoon Goni thawk khan tlang kang phuh chhuah chirh titawlhin mi 10 vel an thi thung.
Kar tawpah khan Pacific atanga insiam typhoon thawkin Mayon awmna lai vel hi a nuai lo chiah chiah a ni.