Aizawl: Tuirial West Block MNF chuan nimin khan Awithangpa Hall, Kawnpuiah conference an nei a. He hun hmanpuitu, MNF Adviser Lalruatkima chuan hnam anga beih an tawh mek lai hian Zoramthanga anga leader tha an nei lo niin a sawi.
Zofate rorelna pakhat hnuaia awm hi MNF nghahhlelh ber a ni tih sawiin Lalruatkima chuan Zofaten zalenna meichher an chhi a, thangtharte thinlungah Mizo a awm chhung chuan Mizo nationalism hi a mit tawh dawn lo tih sawiin, “Tuna kan unau Zofate Jerusalem-ah an lo haw mek a, an tawng a lo awn deuh a nih pawhin unau vek kan ni tih i hre reng ang u,” a ti.
MNF adviser chuan Zofaten hnam anga beih an tawh mek lai hian Zoramthanga anga leader tha Mizo hnam hian a nei lo tih sawiin, “Ramin ri nei mah se, hnamin ri a nei lo. Sakhaw intibingten kan biak inte thlengin an hal a, missionary leh pastor te chenna in thlengin an hal. Tam tak min that bawk a. Kan thinlung a rum a. Hmun hrang hranga awm Zofate tahna hi kan tahna a ni a, an mittui hi kan mittui a ni a. An tan kan ding tlat dawn,” tia sawiin, hnam tana silai lek ngam, martar tam tak awm tawhna party, ramri humhalh tura silai hmet puak ngam hi hnam chhan turin an duap dui dawn lo tih a sawi.
MNF hi a fing ber leh a tha ber, sawisel kai lo an ni lo a; mahse, he ram hi an kutah Pathianin a dah tih sawiin Lalruatkima hian hun harsaa ram leh hnam enkawl tur hian Zoramthanga sorkar hi a ring tawk tih a sawi a. MNF sorkar hian manifesto a nei a, chumi tihlawhtling tur chuan theihtawp chhuahin a bei a, an tihhlawhtlin pawh a tam tawh hle tih a sawi.
Tuirial West MNF Block President B Sakhawliana kaihhruai inkhawmah hian bialtu MLA K Laldawngliana pawhin thu a sawi a ni.