Aizawl: Mizoram Pradesh Congress Committee (MPCC) President Lalsawta chuan an sual tum inthlannaa sum hman tlem hi an hneh ngei tur thu sawiin, “Sum thil tihtheihna hi kan chhu chat tur a ni,” a ti.
Nimin khan Tuirial Block II Congress Committee buatsaihin Khawkunga Hall, Bukpuiah political training neih a ni a. Hmanpuitu Lalsawta chuan, “‘Sum ngah ngah hmeltha’ tiin kan ram hi ram hreawmah kan siam leh dawn em ni, a teuh lo mai,” a ti a. Mizoramah ‘Tuirial bial hi candidate-ten pawisa tam tak an senna a ni’ tiin politician leh ram mipuiten hre mah se, tun atanga inthlan hun hi thla nga chauh awm tawh tihah sum leh paiah an insum theih avangin, miten Tuirial bial an sawi chhiatna zawng zawng chu Congress party-in tihreh an tum a, candidate-te sum sen tlemna bialah siam an tum tih a sawi.
“Vawiina kan sual tum, inthlannaa sum hman tlem hi kan hneh ngei tur a ni. Hei hi Kohhran leh MPF duh dan a ni a. Pathian leh a kohhrante duh dan anga kan kal dawn avangin anni pawhin min pui ngei ang,” a ti.
Sorkar tha pawimawhna chungchang sawiin Lalsawta chuan, “Ram tana thawk an nih avangin minister leh MLA-te chu lo rethei deuh mai rawh se, an rawngbawlsak tur mipuite hi hausa tur chu an ni,” tia sawiin, |ang Puihna leh sorkar tha hmangin kuthnathawktute an chawi chhuak dawn a, khawvel ram changkangte neih ang ram leh mipuiin an nei a, hemi hmang hian ram hi hmasawntir an tum thu a sawi.
ADCC President Lalhmingthanga Pachuau kaihhruai political training-ah hian MPCC Treasurer Dr. Lalmalsawma Nghaka leh AMC Corporator Rosiamngheta te pawhin thu an sawi bawk.