Tunlai hian Mizoram hmun thenkhatah vawk pul hri, African Swine Fever (ASF) leng leh mekin Vety department-in a chhinchhiah chinah vawk 98 a thi tawh.
AH & Vety department hotuten The Zozam Times an hrilh danin ASF leng thawh thumna hian Champhai district luhchilh na berin, hri leng tuarna ber, Ngur khuaah vawk 69 a thi tawh a, a khaw thenawm Zote-ah 12 a thi tawh.
Champhai Zion Veng leh Vengthlang bakah Kelkang khuaah te vawk pakhat theuh a thi tawh bawk a. Vawk pul hri darh zel tur venna atan nimin thlengin Ngur khuaah vawk 80 leh Zote khuaah 10 suat a ni tawh.
Vawk pul hri leng thawh thumna hian Kolasib district chhung pawh tibuaiin Khuangpuilamah ASF kai nia rinhlelh vawk panga leh Diakkawnah paruk a thi tawh.
Heng district pahnih bak Aizawl leh hmun dangah pawh vawk thi hriat tur a awm nual a, hetihlai hian Vety department hotute erawh chuan Aizawl district chhung atangin vawk thi report dawn an neih rih loh thu an sawi thung.
Vety department hotute chuan kuminah hian ASF vangin vawk eng emaw zat thi mah se, kum dang angin a tam rih lo a, tuna hri lengin a khawih nat, Champhai district-ah pawh vawk thi report a tlem tan tih an sawi bawk.