Aizawl : Higher & Technical Education Minister Dr. R Lalthangliana’n Mizoram Scholarship Board buatsaiha tunhnaia UPSC exam hrang hranga tithate lawmpuina hun nimin khan hmanpuiin, Incentive Cash Award Rs. nuai 1 theih a hlan.
Incentive Cash Award dawngtute hi – Dayne Thiamsangliana – UPSC (National Defence Academy) & Naval Academy Exam (II) 2019; Betty Lalrinfeli – UPSC Civil Service Exam, 2022 (interview thleng pha) leh K.C. Zalena – UPSC Civil Service Exam, 2022 (interview thleng pha) te an ni.
H&TE Minister chuan UPSC exam buatsaiha tithate chu a lawmpui thu leh chhuanawm a tih thu a sawi a, an thlen chinah lungawi mai lova a aia nasa zawka tang zel turin a fuih.
UPSC Civil Service Exam 2022-a interview thleng pha mi 2-te chu tuntumah la tling rihlo mahse, beidawng lova tan la sauh sauh tura fuihin, engtik niah emaw chuan an tum ram an thleng ngei turin duhsakna a hlan.
India ramah ziak leh chhiar thiam tam lamah Mizoram chu dinhmun 2-na hauh pha state a ni chungin hnamdangte el pha tur chuan thiamna tak tak neih a ngai a ti a. Tunlai khawvelah mahni subject theuh chu thiam hneh a ngai tawh hle tiin thangtharte leh zirlaiten nasa lehzuala tanlak a ngai a ni a ti bawk.