Nimin khan press accreditation card chu kum 2023-2025 chhunga dawngtu turte hnenah hlanna neih a ni a, hemi hun hmanpuitu I&PR Minister Lalruatkima chuan card hian tangkaina tam tak Mizoram chhung leh pawnah a nei tih sawiin, chutih ruala mawhphurna a ken telte chu hre reng turin chanchinbumite a chah.
Hetih lai hian he accreditation card siam leh buaipui chhung hi a rei hle mai a, famkim lo a tam hle bawk. Sorkar ber felfai tur niawm taka lang si hi a felfai tawk lo hle niin a hriat a, address dik lova dawngte leh thlalak thehluh hmansak lohte pawh an awm nuk mai bawk. Chutiang bawkin, la active tak tak zingah tel reng thin, tel ta miah lote, tel awm ngawih ngawih tel ta lote pawh an awm nual mai a, tel tur nia hriat chiah si loh tel ta lawi site pawh an awm nia hriat a ni!
Card semchhuaktu minister sawi danin, sorkarin chanchinbu mite a dah pawimawh hle a. Accredited journalist ni tura State Press Accreditation Committee-in uluk taka a thlanchhuahten accreditation card an dawng thei chu a lawmpui thu a sawi bawk. Journalist-te chu an thuziak leh thu puanzarin ram inrelbawlna thlenga nghawng a neih theih avangin an pawimawhna hre thar tur leh an thuziakte uluk lehzuala endik thin turin a chah bawk a ni.
Sorkar lamin theihtawp a chhuah niin minister sawi dan hi chuan a lang a, mah se khawi lai emaw bera fel lo lai awm hi chu chinfel harsa niin a lang lo. A hnathawkte vil ven leh chet fel loh thenkhat nia langah hi chuan na zawkin hma la ngam se la, a tul a nih chuan siamthat pawh nei nual ngei teh se. Heti a nih reng chuan rintlak tak taka ngai lo thangthar an lo awm zel palh ang tih a hlauhawm.