Aizawl: Chief Minister Zoramthanga leh Gauhati High Court Chief Justice Sandeep Mehta chuan nimin khan MINECO-a high court building sak mek an enfiah.
Chief minister chuan Gauhati High Court chief justice-in Mizoram a tlawh chu lawmawm a tih thu te, high court building thar chu hawn thuai a niha tangkai taka hman a beisei thu a sawi a; state sorkar atanga mamawhte a awm a nih chuan a inhawn reng thu a sawi a ni.
Chief Justice Mehta chuan he high court building sak chungchangah a bulthut atanga a hmawrbawk thlenga Mizoram sorkarin duhsakna an chan avangin lawmthu a sawi a, building changtlung tak sak a nih avangin leh sorkar laipuiin e-complaint tura court system a beisei angte chu ngaih pawimawh a nih danah te lawmthu a sawi a ni.
PWD engineer-ten building sak dan an sawi danin, NLCPR atanga sum hmuh Rs. nuai 4,624 atanga sak niin, heng bakah hian sum sanction-in a ken tel loh tul leh mamawh dang hrang hrangte siam nan state sorkarin SEDP leh sum hnar dang atangin hna thawh a ni bawk a. Building hi chhawng li – basement, ground floor, 1st floor leh 2nd floor awmin, floor area hi 11,612 sq. mt. a ni.
High court building sak mek tlawhtu chief minister leh high court chief justice te hi Law Minister T.J Lalnuntluanga, Justice Michael Zothankhuma, Justice Marli Vankung leh state sorkar hotu dangten an tawiawm a ni.