LPS Pro Muaythai Championship thla thara neih tura ruahmanna siam tawh chu inbuatsaihna leh remchanna avangin kum thar March-ah sawn hlat a ni.
Organising Committee chuan ruahmanna awm tawh ngun takin a ngaihtuah nawn a, inbuatsaihna kawng hrang hrang leh senso turte bakah player-te dinhmun thlir chungin sawn hlat mai ni se a ti a, March 2024-ah changtlung zawka huaihawt thei turin thutlukna a siam a, tun dinhmuna sak mek LPS Hall, Falkland-ah neih theih a nih ngei a beisei bawk.
Muaythai Association of Mizoram President Pu Brian Lalnunhlima chuan kawng hrang hrang ngaihtuahin sawn hlat hi thil tha zawk a nih thu a sawi a, player-te leh Pro Muaythai tuipuitute hriatthiamna ngen nghal a ni.
2010 khan LPS leh Mizoram Muaythai-in a vawi khat nan championship a buatsaih tawh a, kum 12 hnuah nikum khan hlawhtling takin huaihawt leh a ni a, weight hrang pangaah champion kawnghren inchuhin flyweight-ah Joseph Vanlalhruaia (Hunthar), bantamweight-ah Lalruatkima (Falkland), lightweight-ah Ngursaimawia (Luangmual), welterweight-ah Zarmawia (Chite Veng) leh super middleweight open-ah Lalthasanga Lelhchhun (Tanhril Vengthar) te an champion a ni.