Manipur-a chi leh chi inkara buaina kal zelah Ningani zan khan mipui sang chuang pungkhawmin union minister in an hal.
Scheduled Tribes (ST) category-a tel phutna leh duh lohna thil avanga hnam lian tak chi hnihte intihbuaina kal zelah hian Imphal khawpuia Union Minister RK Ranjan Singh-a in chu beih a ni a, amah erawh a awm loh lai niin thuneituten an sawi.
Mipuite hi curfew puan ni mah se Kongba-a minister chenna in hi an bei tho va. Hetih lai hian inah hian security escorts personnel oakua, security guard panga leh vengtu dang pariat an awm niin thuneituten an sawi.
Venhim hna thawktu pakhat chuan inah hian mipuiin kil tin atangin petrol bomb an vawm chuah chuah niin a sawi.
“Mipui an tam em avangin keini chuan engmah tih theih kan nei lo va, kan thunun thei lo. Kil tin atangin petrol bomb an rawn vawm a, in hnung lam atang te, hma lam leh khawi atang pawhin a ni mai. Mipui thunun theih ngaihna a awm lo,” tiin Escort Commander L Dineshwor Singh chuan a sawi.
Escort commander hian mipui hi 1,200 vel an nih thu a sawi bawk.
Tun hi mipuiin minister in vawi hnih an beihna a ni tawh a. May thlaa beih a nih kha chuan venhim hna thawktute chuan a hnawh darh nan van lam hawiin silai an hmet puak.
Manipur-a buaina hi March 3-a tlangram district-ah ‘Tribal Solidarity March’ huaihawt atanga intan niin Meitei-ten ST status neih an phut duh loh lantirna a ni.
Hemi hma hian ramngaw humhalh laia Kuki mi chengte hnawh chhuah tumna a lo awm tawh bawk a, heta tang hian Meitei nena an inkar a buai tawh a ni.
Meitei hi Manipur-a mihring cheng zinga a tam ber niin tribal hnam – Naga leh Kuki ten an dawt.
Thla hmasa khan Minister of State for External Affairs leh Education RK Ranjan Singh hian Manipur-a Meitei leh Kuki hnam aiawhte kawmin hmarchhak state-a muanna a awm leh theih dan tur a sawipui a. Minister hian Prime Minister Narendra Modi hnenah buainaa inhnamhnawih tual chhung politician-te chu ‘dam chhuaka hrem’ turin ngenna a thlen zui.