END-in minister hovin ruihhlo dona inziahsiak lawmman sem

Excise & Narcotics Department (END) chuan nimin khan Commissionerate building, Conference Hall-ah Minister Dr. K. Beichhua hovin ruihhlo do kawnga sap tawnga hla thuhril inziahsak an buatsaiha tithate lawmman semna hun an hmang.
Lawmman semna hun hmanah Excise Minister Dr. K. Beichhua chuan an hun hman chu END tan ni chhinchhiahtlak tak a ni tih sawiin, ruihhlo do chungchanga mipui inzirtirna atan National Fund For Control of Drug Abuse atanga sum an hmuhte hmangin ruihhlo do kawnga tun hma lama an tih dan pangngai ni loin, Hla Thuhril inziahsiak te hi an buatsaih tak a nih thu a sawi.
Dr K Beichhua chuan ruihhlo do hi thil awlsam tak a ni lo tih sawiin, “Kan luh thuk poh leh beidawnna a tam emaw tih tur a ni. Chutih rual chuan ruihhlo avanga kan thalaite chhiatna leh kan tawrhnate hi nang leh kei hian kan beidawnsan a thiang lo a, nang leh kei beidawng ila tu nge min dosak ang?” a ti.
Poetry inziahsiaknaa telte chu ruihhlo do kawngah an thalaipuite hmaah palai atan a sawm nghal tih sawiin, mipuite pawh tun aia nasa zawkin ruihhlo do kawngah ke pen turin a sawm nghal bawk.
Lawmman semna hun hi Joint Commissioner, Excise & Narcotics Department Z Lalhmangaihna’n a kaihhruai a, Assistant Commissioner Peter Zohmingthanga’n report pein, Commissioner Ngurchungnunga Sailo in intihsiakna result a puang a ni.
Poetry inziahsiakna hi category pahniha then a ni a, category 1 hi Pawl 9 atanga Pawl 12 zirlaite tan niin, category 2 hi College leh University zirlaite inelna atana tih a ni.
Category 1-a lawmman pakhatna hian Rs 30,000 a dawng a, pahnihnain Rs 20,000 leh pathumnain Rs 10000 a dawng a Mi 10 hnenah Consolation Prize hlan an ni bawk.
Category 2-a lawmman pakhatna la tu hnenah Rs 50,000 hlan a ni a, pahnihnain Rs 30,000 dawngin, pathumnain Rs 20000 a dawng a. Mi 10 hnenah Consolation Prize hlan an ni bawk.
Category 1 lawmman dawngtute:

1. T. Lalchhuangkima, Class XI Arts, Nazareth HSS
2. Rody Zotluangpuii, Class X, St. Pauls HSS
3. Ruth Lalthanpuii, Class XI, Gurukul Grammar Senior Secondary School, Guwahati Category 2 lawmman dawngtute:
4. Remalle Ruth Blessy, B. Sc, Biotechnology, Pachhhunga University College
5. Lalmalsawma, BA III Semester, Govt Champhai College
6. Jason L. Khiangte, B. Com III Sem., Pachhunga University College