Aizawl : Rajya Sabha MP K. Vanlalvena leh Lok Sabha MP hlui Vanlalzawma ten Zirtawpni khan External Affairs Secretary (East) Saurabh Kumar hmuin, KMMTTP road laih mek chungchang an sawipui a. Mizoram leh Myanmar inrinnaa Zorinpuiah Border Trade Centre din thuai tul an tih thu an thlen.
Zorinpui – Paletwa inkar motor kawng sial mek chu a laih hna zawh a ni tawh tih report an dawn thu leh motor kawngpui tlang hnuah chauh Border trade centre din a nih chuan a building sak chhung nen hmasawnna a tihkhawtlai theih thu External Affairs Secretary chu an hrilh a ni.
External Affairs Secretary (East) Saurabh Kumar chuan kawng tlang ruala trade centre peih hman a nih theihna tura hmalak thuai a nih tur thu a sawi a. KMTTP road laihnaah harsatna hrang hrang avanga hnathawh chak a harsat thu leh tunah chuan hna a tluan viau tawh thu sawiin, Bay of Bengal atanga Chhimtuipui lui kaltlanga Mizorama bungrua a luh hunah chuan Mizoram mai ni lo hmarchhak state dang te tan pawh chhenfakawm a nih a beisei thu a sawi bawk.
KMTTP hi India sor- kar leh Myanmar sorkar- in April 2008 a inremna thuthlung an ziah hma- nga bul tan niin, Vanlalzawma, Mizoram Lok Sabha MP a nih lai a ni a. Sittwe lawngchawlh hmun atang hian Paletwa thleng lawngin an lo fang tawh a ni.