Aizawl : National Legislators Conference hmanga Mumbaia kal Assembly Speaker Lalrinliana Sailo-in Inrinni khan Mumbai Mizoram House a tlawh a, he hmuna thleng damlo te a kawm bawk.
Lalrinliana Sailo chuan kum 2005-ah Mumbai Mizoram House chu hawn a nih thu sawiin, hruaitu hmasa ten theihtawp an lo chhuah vang a nih thu leh an thahnemngaihna chhuanawm a tih thu a sawi a. Mizoramah cancer vei an tam avangin Health Minister a nih laiin cancer vanga thihna tihniam turin theihtawp chhuah a nih thu leh hemi atan cancer tamna ram Japanah Mizo Surgeon 2 tirh an nih thu te sawiin, an lo haw hnuah cancer phaia thawn pawh nasa takin a tlahniam niin a sawi.
Cancer enkawl kawngah hmuh chhuah hma a pawimawhin hemi atana early detection drive kalpui tura hmalakna chu beisei anga a hlawhtlin loh avanga pawi a tih thu pawh Lalrinliana Sailo chuan a sawi a. Mumbai Mizoram House-a hnathawkte chu damlote tana an inpekna leh Mumbaia Mizo awm ten harsatna an tawh changa an buaipui țhin danah fakin, milian mite thliar lova damlote an hmasak dan indawta accomodation pek an ni țhinte chu țha a tiin mite tana malsawmna lo ni zel turin a chah.
Lalrinliana Sailo chuan damlo te tan a țul țula hman atan Damlo Welfare Committee hruaitute hnenah Rs.30,000 a hlan a. Țawngtaina hun a hmang bawk.
Speaker Lalrinliana Sailo hi Mizoram MLA pahnih – Nihar Kanti Chakma leh BD. Chak- ma te bakah official ten an tawiawm a ni.