Mamit Sub Hqrs. MHIP leh SP Office (DEF) Mamit tangkawpin Inrinni khan Mamit khawpui chhungah zuk leh hmuam do leh Gutkha product zuarlo tura inzirtirna ‘mobile awareness campaign’ an buatsaih.
Mobile awareness campaign hi Mamit khawpui chhung kawngdungah neih niin, sorkar laipuia Ministry of Health and Family Welfare-in ‘The Food Safety and Standards Prohibition and Restrictions on sales regulations 2011’ a tihchhuahte leh Mizoram sorkarin 2015 May ni 28-a Gutkha product hrang hrang khuahkhirhna a siam anga, zawrh, hralh leh semkual khap a nih thu leh a ti luite hrem an nih tur thute an tlangaupui a ni.
Mamit SP office atangin Freddy Lalramthara OC, Robert Lalremruata, SI te bakah MHIP Sub Hqrs atangin Lalzamliani Khiangte leh Laltharzeli ten hun an hmang a. “Kan tu leh fa ten enge an addict tih hrelo nu leh pa kan tam hle” tiin, mihring ei tura siam leh buatsaihah Tobacco (vaihlo leh a kaihhnawih) telh chu danin a khap tlat a nih thu an sawi a. Sumdawngte chu ram leh hnam danin a khap leh phalloh Sikhar leh Tiranga-te zuar tawhlo tura hrilhin, a ti luite chu dan hmanga hremna pek an nih tur thu te an hrilh bawk.