Aizawl: Mizoram sorkar department hrang hranga centrally sponsored scheme (CSS) hnuaia thawkten an dinhmun zirchiangtu, Study Group rawtnate sorkarin a tihpuitlin loh avanga lungawi lohna lantir nan leh sorkar kar nan June 20-22, 2023 chhung badge dum bela hnathawh an tum.
CSS hnuaia thawk pawl hrang hrang inzawmkhawm, All Mizoram CSS Employees Coordination Committee chu Zirtawpni khan an thukhawm a, Study Group rawtnate June 15 hma ngeia tihlawhtling tura sorkar an phutna tihhlawhtlin a nih loh avanga lungawi lohna lantir nan leh an thil phut tihlawhtling tura sorkar kar nan June 20 atanga ni 22 chhung badge dum bela hnathawh an rel a, hemi chungchangah hian Zirtawpni khan Deputy Chief Minister Tawnluia hnenah memorandum an thehlut bawk.
Deputy chief minister hnena memorandum an thehluhah hian lungawi lohna lantir nan ni thum chhung badge dum bel an tum thu tar langin, hemi hun chhunga sorkar atanga thu lawmawm engmah an dawn loh chuan an thilphut a hlawhtlin ngei theih nan hmalak zel an tum thute an tar lang.
All Mizoram CSS Employees Coordination Committee chuan central atanga CSS Fund Mizoramin a hmuh, a hun takah State Nodal Agency-a pek chhuah thin a nih loh avanga hmasawnna hnathawhna tur sum leh hlawh a hun taka pekchhuah a nih loh chungchang pawh ziak telin, central guideline anga ni 21 hma ngeia a dawng tur nodal agency-ah pekchhuah thin ngei an phut thu an tar lang bawk.
Study group hian CSS hnuaia thawkte hamthatna tur hrang hrang – seniority based-a a tahtawla dahngheh, CSS employee-te tana recruitment rules siam, CSS employee-ten medical reimbursement an neih ve theih dan tur siamsak, transfer TA/DA siamsak leh rawtna hrang hrangte a siam a ni.