Aizawl: Hachhek Bial Kuhva Chingtu Pawl (HBKCP) chuan nimin zing dar 1 leh 2 inkar khan Kawrthah leh Rengdil inkarah dan lova kuhva tawlhruk lirthei lian phur hnih an man a. Lirthei vila vengtu leh kuhva neitu pawh an man tel.
Kuhva ro an man hi quintal 144 vel nia chhut a ni a, a phurtu truck (Ashok Leyland) MZ 01U 9525 khalhtu, Laldanmawia, Tuikual South, Aizawla awm nia inchhal a ni a. Kuhva a phurh hi Champhai atanga truck terminal a dah tur niin driver a theih zui tak loh avanga inhlawha khalh chhawk niin an insawi bawk.
Truck dang (Tata), MZ 05 4017 neitu leh khalhtu hi Vanlalnghaka, Bawngkawn Hmar venga awm nia inchhal a ni a. Driver pahnihte hi dan phal loh kuhva phura khawthlang lama an kal vawi khatna ve ve niin an insawi.
Heng lirthei lian pahnihte vilvengtu (escort), car var (Wagon R) MZ 01K 4332 khalhtu, Lalmuanawma, Luimawi pawh man nghal a ni a. Lalmuanawma hi hmanni lawka BSF-ten kuhva an mansak leh kudam neitu niin Ashok Leyland-in a phurh pawh hi a kudama dah tur a nih thu a inpuang bawk.
HBKCP-in kuhva ro an man leh a phurtu lirthei chungchang hi an sawiho hnuah police kuta hlanin, Champhai atanga kal zel a nih avangin custom lamah pek zui nghal a ni.
Kuhva ro an man hnua HBKCP-in thuchhuah an siamah an huam chhunga khaw tin association/society-ten mahni area theuhah dan phal loh kuhva ro phurte en thlithlai zui zel turin an ngen a. Zamuang Check Post thleng lova man a awm pawhin hriattirna an lo siam tawh angin, a mantu association/society-ten an duh anga action lak phalsak an nih thu an tar lang.
Dan phal loh kuhva chungchanga DC, Mamit order ding lai a awm lai renga Hachhek bial chhunga tun thleng phurh luh a la ni reng leh a kalkawnga an la hmang lui chu HBKCP chuan an duh lovin a haw tak zet a, tun hnuah mi tumah tilui tawh lo tura ngen nawn lehin, an ngenna ngai pawimawh lova tilui an awma harsatna an tawk a nih pawh an cho chhuahah an ngaih thu an sawi.
Hei bakah sorkar hnathawk emaw, mi mal emaw pawh hetianga inhnamhnawih hriat chhuahte chu a na thei ang bera an chunga action lak a nih theih nan thuneitu sang zawka thlenin hma an lak zel tur thu an sawi bawk.