Aizawl: Pachhunga University College (PUC) chuan Inrinni khan zirl;ai zo mai tawh tur 1,000 chuang thlahna hun, Grad Dinner an nei a. MZU Vice Chancellor Prof Dibakar Chandra Deka-a’n a hmanpui.
PUC-ah hian zirlai 2980 awmin chung zinga 991-te chu BA, BBA, BCom leh BSc an ni a, post-graduate zirlai 44 an awm. India rama college tha thlanna NIRF (National Institutional Ranking Framework) 2023-ah India hmarchhaka college tha ber a ni mek a ni.
Kum tin zirlai 1000 bawr an graduate ziah thin a, kuminah pawh nikuma an result atanga an tla hniam a nih loh chuan 950 bawr velin degree an nei thar ang a, post graduate thar 40 chuang an awm dawn a ni.
PUC Auditorium-a zirlai chhuak turte thlahna hun hmanpuitu Prof Dibakar Chandra Deka chuan, India ram college tha berte zinga zir chhuak tur an ni chu a lawmpui thu a sawi a. “Tunah chuan khawvel pum hi in tana zuan luh theihin a inhawng a, in zuang lut dawn a ni,” a ti a; zirlaite chu an lo hlawhtling viauin khawvel ram changkang tak takah an kal pawh a ni thei a, mahni ram theihnghilh lova let leh turin a chah.
MZU Vice Chancellor chuan khawvel ram dangah kalin, nuamsa leh ropui takin awm mah ila, mahni ram leh chhungkua, chawr chhuahna society te hi rethei leh changkang lo zawk hriat reng tul a tih thu a sawi. Amah ngei pawh Japan rama nuam taka khawsak theihna kalsana lo let a nih thute a sawi.
PUC Principal Prof H Lalthanzara pawhin zirlai chhuak turte chu an thawhna apiangah rinawm leh taima taka thawk turte, khua leh tui tha tak ni turte leh an zir chhuahna hre reng turin a chah bawk.
PUC hian kum 2006 atangin an zirlai chhuak turte tan zir chhuah chawhlui Grad Dinner an buatsaih thin a, Covid 19 avangin 2020 leh 2021 khan an buatsaih thei lo a, kumin hi a vawi 16-na a ni.