Nepal khawpui lian pahnih chuan India film thar pakhata an tawngkam hman chu an duh loh avang leh tihreh a nih hma chu Bollywood siam film-te chhuah phalna an pe dawn lo tih an sawi.
Adipurush siamtute chuan an film hi Hindu thawnthu, Ramayana behchhan a nih thu an sawi.
Ramayana hi Hindu pathian, Ram-a’n ramhuai lal, a nupui Sita-i ruksaktu, Ravana a hnehna chanchin a ni.
A film-ah hian a changtute chu Raghav, Lankesh leh Janaki tih hming puttir an ni.
Kathmandu leh Pokhara mayor-te chuan a thawnthua Janaki-i chu ‘India fanu’ tia sawi chu an duh lo tih an sawi.
Nepal-ah hian mi cheng 80% chuang chu Hindu an ni a, Sita-i hi an khawpui, Kathmandu atanga km 220 vel leka hla, Janakpur khawpuia piang niin an ngai.
Kathmandu Mayor Balendra Shah chuan Pathianni khan Facebook-ah an khawpuia theatre-te chu Bollywood film an tihchhuah titawp vek turin a ti a. Adipurush siamtute chu an tawngkam hman thlak turin a ti bawk.
“Kan duh loh hi paih a nih hma chuan Kathmandu khawpui chhungah Indian film hrim hrim chhuah a ni lo vang,” tiin a tar lang.
Indian news agency ANI chuan Pokhara Metropolitan City Mayor Dhanraj Acharya pawhin theatre-te chu movie chhuah titawp turin a ti bawk niin a tar lang.
A film thawnthu ziaktu pakhat zawk, Manoj Muntashir Shukla chuan Pathianni vek khan inbiakna thenkhat chu siam that a nih thu a sawi a, a entu thenkhat rilru a lo ‘tina’ tih a sawi a; mahse, India nge Nepal mipui rilru tih erawh a sawi lo.
“Tlar 4,000 vel ka ziak a; mahse, tlar nga velin mi rilru a lo tina a ni,” a ti bawk.
ANI chuan film producer T-Series chuan Shah hnenah lehkha thawnin ‘tu rilru mah tihnat tumna an nei lo’ niin an tar lang.
Adipurush-ah hian Indian lemchang thiam – Prabhas, Kriti Sanon leh Saif Ali Khan te changin Zirtawpni khan tihchhuah tan a ni a. Indian entu tam ta chuan a visual effect leh an tawngkam thenkhat chu an sawisel ve tho.
Zirtawpni atang khan chhuah khap tura tihna chu social media-ah a lar hle a; mahse, T-Series chuan Inrinni khan an film chu ‘ropui taka chhuah’ a nih thu an tar lang ve thung.
Eptu party hruaitu thenkhat pawhin an sawisel a, khap tura ti pawh an awm.
Chhattisgarh Chief Minister Bhupesh Baghel chuan an tawng hman chu ‘a mawi lo’ a ti a, an state chuan khap a tum mek tih a sawi bawk a. Singh hi Congress party mi a ni.
Shiv Sena MP Priyanka Chaturvedi pawhin film chuan ramri a pel deuh niin a sawi ve bawk.
A siamtute hian an film-ah hian rorel lai, Hindu nationalist BJP mi leh sa eng emaw zat chunga lawm thu an sawina an tar lang.
Film hi India-a siam tawhah chuan a man tam ber pawl nia sawi niin hmun 6,000 chuangah chhuah a ni a. Hindi leh Telugu tawnga siam niin tawng danga leh a ni bawk.
October thlaa a teaser tihchhuah a nih tum pawh khan cartoon ang deuhva computer graphics leh visual a tam avangin sawisel a lo hlawh tawh bawk a ni.