Aizawl: Mizoram Pradesh Congress Committee (MPCC) chuan Manipur tual chhunga buaina chhuak kaihhnawihah Manipur Chief Minister N. Biren Singh ngenna ang ang lo pawmpui duak duak chu Mizoram tan him lovah an ngai.
Nimina an thuchhuahah MPCC chuan Pathianni chhuna Chief Minister Zoramthanga leh Manipur chief minister te phone hmanga inbiain Manipur-a buaina awm a reh thuai theihna tura hmalak chungchang an sawi dun nia sorkar thuchhuahin a tar lan chungchangah, May 3 atanga Meitei-ten Manipur-a Zohnahthlakte chunga buaina an siam tirh khan Manipur chief minister hian Mizoram CM pawh be duh loin, a phone call pawh a chhang duh lo hial tih an sawi a. Rapthlak tak leh rawva taka Zohnahthlakte chunga an chet hnua phone call hmang maia inbiakna kalpui a ni leh, Manipur chief minister ngenna ang ang lo pawmpui duak duak hi Mizoram tan him lovah an ngai tih sawiin, “Chief Minister Pu Zoramthanga hi Mizoram leh Mizo hnam zahawmna humhim tura Manipur Chief Minister Biren Singh-a bawl kual vel mai maia awm lo turin kan ngen a ni,” an ti.
MPCC chuan pawnlawi taka state pahnih chief minister-te an inbiak mek laia All Assam Manipuri Youths’ Association (AAMYA)-in rorel lai MNF party an vau ngam chu a phenah Manipur CM a awm an rin thu an sawi a. AAMYA-in June 23 atanga Assam leh Mizoram inkalpawhna kawng tiamchin awm lova danchah an tum, Hmar Students’ Association – Assam Hills (HSA) leh NC Hills Indigenous Students’ Forum (NCHISF)-te hmalakna vanga thulh a ni chu lawmawm an tih thu leh an hmalakna chhuanawm an tih thu an sawi bawk.