Mizoram Pradesh Congress Committee (MPCC) chuan vawiin chhun dar 12 hian Vana Pa Hall-ah City Workers’ Meet leh mi thar lawm luh hun an hmang dawn a. Mi lawm luh tur zingah mi langsar tak tak an tel nia hriat a ni.
Thudawn danin, MPCC-in an party-a mi thar an lawm luh tur zingah Mizoram chief secretary hlui, Lalnunmawia Chuango a tel a. Ani hian June 12, 2023 tlai khan Larsap Dr Hari Babu Kambhampati hnenah Mizoram State Chief Information Commissioner (CIC) nihna atanga bânna a lo theh lut tawh a ni.
Lalnunmawia Chuaungo bakah hian LPS Special report buatsaihtu, Vanneihthanga Vanchhawng, home department-a secretary nihna lo chelh tawh, Lalbiakzama leh Mizorama Vestige company hotunu ber nia deputy chief minister hlui, Lalhmingthanga fanu ni bawk, Meriam L Hrangchal te an tel a ni.
Meriam L Hrangchal hi kumin MLA inthlanpuiah Congress ticket-a Lunglei South bial-a ding tura sawi thawm a awm bawk.
MPCC hian tun thla tir khan mi thar lawm luh programme hi hman an lo tum tawh a. Mahse, rokhawlhna avangin programme hi an lo thulh tawh a ni.
Vawiina mi thar lawm luh inkhawmah hi ruahman lawk dan chuan MPCC Vice President Lal Thanzara’n a kaihruai dawn a. Lawm luh turte inhmelhriattirna hi Lalrinmawia Ralte, Adviser to President, MPCC-in a nei dawn a. MPCC President Lalsawta’n mi tharte a lawm luh bakah thu a sawi bawk ang.