Taekwondo Federation of India buatsaih 19th Asian Games Hungzhau 2022 a India aiawh tur thlanna chu Pathianni khan Nadiad, Gujarat-ah zawh fel a ni a. Poomsae Inelnaa khel tur thlanchhuahah Lalthlamuanpuia, Venghlui leh Daniel Lalhumthanga, Chhinga Vengte an tel.
India aiawh tur thlanna tel tur hian National Senior Championship hnuhnung ber medalist leh international player atanga ko an ni a. Mizo naupang pali – Lalthlamanpuia, Daniel Lalhumthanga, H.Vanlalfela leh Hmangaihzuali te chu Poomsae huangah ko an ni. An pali zingah hian pahnih an tling.
Poomsae selection hi round thum a khelh tir an ni a. First round ah poomsae pahnih theuh khelh tir an ni.
An point score that dan milin Seeded 1 – 10 siam a ni a. Thlamuanpuia’n a score tha ber a seeded 1 ah awm. Daniela parukna a ni ve bawk.
2nd round hi knock out system niin seeded sang leh hniam an in tum leh vek a. Thlamuanpuia’n Manipur aiawh tumin a hneh a. Daniel-a pawhin amah aia seeded sang Arunachal aiawh tumin a hneh bawk.
Final Round lut mi panga te hi chu poomsae pahnih theuh hmangin an in el leh a. A tawp thlengin Thlamuanpuia chu pakhatna a ni a. SSCB atanga tel in dawt a, Daniela chu pathumna a ni ve bawk.
Final result ang hian Asian Games ah chuan Thlamuanpuia chu Individual a khel ang a. SSCB atanga tel ten Pair an khel ang. Daniela erawh Reserve player a ni thung ang.
Thlamuanpuia leh Daniela te hi South Asian Games 2019 khan Gold an lo la tawh an ni a. Asian Games hma hian India ram chung bakah ram pawnah training an nei dawn a. An lakah Beiseina sang tak kan nei ani” tiin MATA General Secretary Master Joseph Thansanga chuan a sawi.
India aiawh thlannaah hian MATA General Secretary hi Selection board member tura ko a ni bawk.