Belgian khawpui pakhat, Antwerp-a sikul chimah a sak hna thawktu mi panga an thi.
Zirtawpni chawhnu khan a building thenkhat hi a chim thut a, a dawlna an siam chu a tlukpui niin tual chhung chanchinbute chuan an tar lang a. A chim chhan erawh hriat a la ni lo.
Kangthelh leh chhanchhuah hna thawktuten Inrinni khan ruang pahnih lak chhuak belh lehin in chima chin hriat hriat lohva awmte chu hmun kim an ni.
Thi zinga pahnih hi Portugal leh Romania-a mi an nih thu police-ten Belgian chanchinbu hnenah an sawi.
Mi pakuain hliam an tuar bawk a, an zinga pathum chu intensive care-ah dah ngai an ni a. Ngaihtuahawm tak erawh an ni lo niin fire department chuan a tar lang.
Chhanchhuah hna thawhnaah hian fire department hi tual chhunga mi chhanchhuah hna thawk thinten an pui a. Ui fing leh drone nen dam chhuakte zawn hna an thawk.
Brussels Times chuan Nieuw Zuid quarter-a primary school hi September 1-a sikul session thar atana inhawn tuma inbuatsaih mek an ni thu leh a thuam that hna thawk mekin sikul kai tan hmaa thawh zawh ngei tum an nih thu a tar lang.
Thite hi in satu, Democo hnuaia sub-contractor-a thawkte an ni tih Belga news agency chuan a tar lang.
Company managing director, Frederik Bijnens chuan, “Thawkte zawng zawngin hrehawm kan ti a ni,” tiin news agency hnenah a sawi a. “Emergency services-in an theihtawp an chhuah a, chhiatna thlen chhan hi chiang taka chhui a ni ang,” a ti bawk.
Chhiatna thlenna hmun hi Inrinni khan King Philippe chuan tlawhin police, kangthelhtu leh damdawi lam thiamte pawh a bia a. Prime Minister Alexander De Croo-an a tawiawm bawk.