Aizawl: Thawhlehni khan Aizawl West III bialtu MLA VL Zaithanzama chuan tun hnaia HSSLC result chhuaka Mizoram pum huapa top 10 ni phak, a bial chhunga zirlai pali hnenah lawmpuina laptop a hlan.
Kum danga a tih thin angin kuminah pawh zirlai tithate chu an inah kal chilhin VL Zaithanzama hian zirlai tithate chawimawina leh lawmpuina a hlan a. Kuminah hian Aizawl West III huam chhunga zirlai titha top 10 mi pali – Lalawmpuii, Maubawk (Arts-ah 2-na); Grace Lalrinpari Hauzel, Khatla (Arts-ah 5-na); Benjamin Lalsawmtlinga, Bungkawn (Arts-a 5-na) leh K. Vanruatpuia, Bungkawn (Arts-ah 10-na) te hnenah lawmpuina a hlan a ni.
VL Zaithanzama chuan, “Zirna tel lovin hlawhtlinna tluantling a neih theih loh a, ram siam that nan leh hnam humhalhna kawnga tha ber pakhat pawh zirna a ni,” tiin, HSSLC leh HSLC-te hi zirna kawnga kailawn hmasa a ni chauh thu a sawi a. Lehkhathiam tak tak tan hna a vân ngai loh thu leh hna hmuh hi hlawhtlinna a la nih loh thu a sawi bawk.