ZPM party-a Consultant PL Liandinga chu bial vil tura ruat zingah telin, Aizawl East I vil tura tih ni mah se an hotute thu rawn angin a inhnuk dawk a, hei avang hian ZPM atangin chhuah a tum lo tih The Zozam Times a hrilh.
Thawhlehni khan The Zozam Times-in PL Liandinga hi a chenna inah a kawm a, bial viltu atanga a inhnuhdawh chhan zawhna chhangin, “June 17 khan kan hruaitute an lo leng a, ‘Hei, i tlin zawh loh mai a hlauhawm a nia, in inhnukdawk mai dawn em ni?’ an ti a, ‘Mizopa kan nia, hotuten tlin loh min hlauhthawnpui chuan kan inhnukdawk tur alawm,’ ka tia, ka inhnukdawk ta a ni,” a ti.
PL Liandinga chuan Aizawl East I bial viltu atanga inhnukdawk tura an tih chhan sawiin, “Khatia bial viltua min han ruat khan block hruaitu lamin, ‘Pu Duhoma hian bial hnih nan min hmang rawh se,’ tiin headquarters lamah thu an lo theh lut a ni awm e,” a ti a, a tlin zawh loh an rin avanga inhnukdawk tura tih an nih thu a sawi rualin amahin a hriat danah erawh mipui lam atangin amah an duh lohna emaw, a tlin an rin lohna emaw pawh a awm a hriat loh thu a sawi.
An hruaituten a tlin zawh ring lo mah se Pl-a erawhin a tlin theih ngei a rin thu a sawi thung a, “November thla tawp hma hi chuan kan in thlang dawn lo tawp a, thla li tha teng tawng hi campaign-na hun tha a la awm a, chutah chuan dik taka Pathian hriatpui tlaka kan campaign chuan ka tlin ngei ka ring,” a ti.
Bial viltu-ah tel tawh lo mah se lungawi lohna a neih loh thu leh ZPM chhuahsan a tum lo thu a sawi a, a tan chuan party danga luh ve a thiang lo a, ZPM chu a neitu a nih thu a sawi a, a duh dan anga thil a awm loh avanga puanthuah nena input chhuah nghal zel chu patling tih awmah a ngai lo tih a sawi.
ZPM party inrelbawlna chungchang zawhna chu chhangin, Working President K Sapdanga chu a tir tê atanga ZPM din chhuaktu, awm lo ata ZPM awmtirtu a ni a, working president nia office a enkawl lai kha chuan a fel fai tih a sawi a, tun hnua president-in a hna a thawh leh theih hnuah erawh eng eng emaw thil chu a awm ta em aw a tih thu a sawi bawk a ni.