Mizoram Pradesh Congress Committee (MPCC) chuan nimin khan Vana Pa Hall-ah Aizawl khawpui chhung Congress party intuaitharna leh mi thar lawm luhna hun an buatsaih a, MPCC President Lalsawta’n an party zawm tharte a lawm lut.
Congress party zawm thar zingah mipui hriat hlawh, chief secretary hlui, Lalnunmawia Chuaungo, IAS (Rtd); home secretary hlui, Lalbiakzama, MPS (Rtd); LPS Special report buaipuitu, Vanneihthanga Vanchhawng; Chhimbial Chhantu General Secretary Eric F Zomuanpuia; Vestige company hotunu, Meriam L Hrangchal te bakah The Aizawl Post News Editor Lalremruata Renthlei; LC Sofa neitu, Lalchhunga; SBI chief manager hlui, Lalnilawmi leh Advocate Laldingngheta te an tel.
Anni bakah block huam chhung unit hrang hrang atangin mi 772-te chu MPCC president-in an party-ah a lawm lut a ni.
Mi thar lawm luhna hun hmanah Lalsawta chuan an party zawm tharte chu khelh fuh tum lo, politics-a tihfuh tum lo, ram leh hnam hmangaih vanga ram leh siam tha tura Congress party zawm an nih thu sawiin, “Kan hnena an lo kal chhan chu Congress-in hna Mizoram tana kan thawhpui theih tura an rilru siamsaktu chu Pathian a ni. Pathian hnenah lawmthu ka sawi a ni,” a ti.
Mizoramin ram kan nei tha tih sawiin Lalsawta chuan, “Mipui leh ram tha Pathianin min pe a, ram leh mipui nei tha kan nih avangin dinchhuah kan hmabak a. Sorkar tha siam turin kan thei a, kan tlin a, chu chu Congress party-in kan tum a ni,” a ti.
Party thenkhat chuan an sum neih hmachhuana inthlan hmachhawn an tum laiin Congress erawh chuan Mizoram tana sorkar tha siam turin Pathian lam an hawi tih sawiin, “Party thenkhat chu inthlan behbawmah an lung timuangtu chu sum a ni a. Keini chuan sum kan nei lo, candidate-te mi hausa ni lo mah se mi tha, mi dik leh rintlak an ni dawn,” tiin, Congress party mite chu mahni aia ram dah hmasa tur leh candidate-te phur tirit lo turin a ngen.
Lalsawta chuan India ramah sakhaw zalenna nasa taka rahbeh a ni a, Kristiante leh hnam tenaute an chep tih a sawi a. Ram leh hnam, sakhaw himna turin an sawi duh zawng leh an tihduh zawngah te, anmahni vanga thawhpui hreh an awm lohna turin an danglam tur a nih thu a sawi.
Congress party zawm thar, Lalnunmawia Chuaungo pawhin thu sawiin state dangah hun rei tak hna thawkin a awm chhungin an thil tih tha Mizorama tih theih a awm ve nia a hriat thu a sawi a. Thil zawng zawng chu tih theih loh mah se, thil tha eng emaw zat chu Mizoram tan a tih ve theih dawn nia a hriat avangin politics-ah a zuang lut tih a sawi.
Lalnunmawia Chuaungo chuan eng party-ah pawh awm ila, chief minister tur hi tunge tih an thlir a, an zir chian a ngai tih sawiin, “Kan CM ngaihdana ram hi kal tur a nih avangin CM an pawimawh hle a. Mipuite pawhin sum leh paiah a rinawm em, dawt thu hmangin mipui bum a ching em, a thutiamah a ding em, tih thlir chunga vote thlak thin turin Zoram mipuite ka ngenin ka sawm duh a ni,” a ti.
Inkhawm hi MPCC Vice President Lal Thanzara’n a kaihruai a. MPCC Media Department Chairman Dr. Lallianchhunga’n Tang Puihna hrilhfiahna hun a hmang a. Lawm luhte atangin Lalnunmawia Chuaungo bakah Vanneihthanga Vanchhawng, Eric F. Zomuanpuia, Meriam L. Hrangchal, Lalnilawmi leh mi dangten thu an sawi bawk.