Honduras-a hmeichhe tanna lung inah Thawhlehni khan buaina nasa tak chhuakin mi 41 vel an thi.
Mi sual pawl (gang) inhaw tak inkarah buaina hi a chhuak a, pawl khat chuan pindan (cell) pakhat an hal a ni.
Thuneitute chuan thi zinga a tam ber hi kang hlum an nih thu an sawi a; mahse, silaia kah, vih hlum leh sawisak hlum an awm nual bawk tih an sawi.
Engtin nge mi tangten silai leh chem (machete) an lak luh theih tih chu chhui mek a ni.
Nikuma gang chhut chimih tumna kalpuitu, President Xiomara Castro chuan ‘hmeichhiate inthahna nasa tak’ a thleng chuan a barakhaih thu leh ‘na taka chhan let’ a nih tur thu social media-ah a tar lang.
Security Minister Ramón Sabillón chu chawlhtir nghalin national police force-a hotu, Gustavo Sánchez chu a aiawh turin a dah.
Dam chhuak thenkhat chuan pawl intibuaite hi Central America-a mi sual pawl tawrawt ber ber pahnih, 18th Street Gang leh MS-13 mite an nih thu tual chhung chanchinbute hnenah an sawi.
Gang pakhat zawk member-ten lehlam pawla mite an tihthinrim hnuah lehlam pawl hian an mutbu (mattress) tel khawmin an hal khung ta niin an sawi.
Social media-a video darhah chuan an khawpui, Tegucigalpa atanga hmar lam km 25 vela hmeichhe tan in atanga meikhu chhuak pawh hmuh theihin a awm a. Tan inah hian mi 900 vel an tang mek.
Intibuai pawl hnih hi lung inah hian pindan hranah dah niin an dahna pindan peng erawh a inhnaih hle thung.
Intihbuaina hi Thawhlehni zing hma taka chhuak a ni.
Dam chhuakte chuan thi eng emaw zat hian kang laka him nan bual in an pan hlawm niin an sawi a. An ruang pawh inbawhthuah tupin hmuh a ni bawk.
Thenkhat chu gang member-ten corridor leh tan in tuala an kah hlum leh vih hlumte an ni.
Thi zinga thenkhat hi chu khawi lam pawl mah ni lo ve ve an ni a; mahse, buaina chhuaka intat lut palh leh a nanchin avanga tuar ve ta an ni hlawm.
Tu pawl mah ni lo thi zingah hian police cadet hlui pakhat, a officer-pui a that tih a inpuan hnua kum 15 chhung lung in tang tura tih pawh a tel.
Thi zingah hian mi a ruk bo avanga a tan hun tlingtla tep tawh, chhuak mai tura inbuatsaih tawh pakhat a tel bawk.