Firfiak pawl hlauhawm leh lian tak tak pali – Lashkar-e-Taiba, Jaish-e-Muhammed, Hizbul Mujahideen leh Ansar Ghazwat-ul Hind-a an hotu (chief)-te chu thla li liam ta chhungin kah hlum an nih thu IGP (Kashmir) Vijay Kumar chuan a sawi.
“Venhim hnathawktute ka lawmpui a, tun anga firfiak pawl lian pali – Lashkar-eTaiba, Jaish-e-Mohammed, Hizbul Mujahideen Ansar Ghazwat-ul Hind hotu lawkte thla li chhunga kah hlum vek hi a la awm ngai lo va. Anni thah an ni hi an pawlah nghawng lian tak a nei a ni,” tiin Kumar hian nimina thuthar lakhawmtute a kawmnaah a sawi.
“Ni hnih liam ta chhung khan beihpui thlak lian tak tum hnih kalpui a ni a. Inrinni khan Kulgam-ah firfiak 2 kah hlum an ni a, 2 an tlan chhia a. Kah hlum pakhat zawk hi Pakistan-a Punjab province-a mi niin kum 3 liam ta chhung khan Kulgam-ah hian a tam hle a. Silai kap thiam tak leh IED lam hre tak a ni a. AK-47 leh pistol leh puak thei dang laksak a ni,” a ti.
Kumar chuan Inrinni tuk khan Pakistani spy drone chu Border Security Force (BSF)-ten Kathua-ah an kap thla a, Pulwama-a firfiak awmte tana thawn a nih an rin thu a sawi.
“Kulgam-ah hian Pakistani Jaish-e-Mohammed hnen atangin AK-47, M4 carbine leh pistol hmuh a ni a. Jaish firfiakte hian M4 rifle an hmang thin a. Drone kah thlakah pawh hian M4 rifle a awm,” Kumar chuan a ti.
Kathua-a drone kah thlakah hian ‘Ali bhai’ an tih pawh a inrawlh nia an hriat thu Kumar chuan a sawia. “Record kan en chuan Pakistani firfiak, Furkan an tih chu Pulwama-ah a awm a. M4 rifle pawh hi ama tana thawn luh a nih a rinawm,” a ti bawk.
Srinagar-a Zabidal-a beihpui thlaknaah pawh firfiak 3 kah hlum an nih thu IG Kumar hian a sawi a. “An awmna leh anmahni hriat a nih hnuah mi challang deuhte chu inpe tura ngen tura tirh an ni a; mahse, an duh lo va, kah zui niin thah an ni a, an zinga 2 chu tute nge an nih pawh hriat tawh a ni,” a ti.